ABŞ prezidenti Donald Tramp ABŞ sənaye liderlərinin əsas texnologiyanın inkişafına potensial mənfi təsiri barədə xəbərdarlıqlarından sonra süni intellekt (Sİ) ilə bağlı çoxdan gözlənilən bir sərəncam imzalamaqdan imtina edib.
Bu barədə The Washington Post (WP) mənbələrə istinadən xəbər verir.
Qəzetin məlumatına görə, SpaceX-in baş direktoru Elon Mask və Meta Corporation-ın baş direktoru Mark Zuckerberg də daxil olmaqla texnologiya sənayesi liderləri ABŞ prezidentinə xəbərdarlıq edərək bildiriblər ki, administrasiyanın təklif etdiyi yeni təhlükəsizlik baxış sistemi ABŞ iqtisadiyyatının mərkəzində olan bir texnologiyanın inkişafına mane ola bilər.
The Washington Post-un məlumatına görə, Ağ Ev aparıcı texnologiya şirkətlərinin rəhbərlərinə cümə axşamı günortadan sonra keçirilməsi planlaşdırılan imza mərasimi üçün dəvətnamələr göndərdikdən sonra Tramp sərəncamı imzalamamaq qərarına gəlib.
Tədbirdən bir neçə saat əvvəl bəzi Silikon Vadisi nümayəndələri imza mərasimi üçün artıq Vaşinqtona yola düşdüyü üçün Tramp Oval Ofisdəki jurnalistlərə sərəncamı ləğv etdiyini açıqlayıb. O, bu qərarı hazırkı formada sərəncam layihəsini “bəyənmədiyini” söyləməklə əsaslandırıb. ABŞ prezidentinin sözlərinə görə, bu, Amerika iqtisadiyyatına fayda verən süni intellekt inkişafına maneə ola bilər.
