Qara dənizdə, Rumıniya sahilləri yaxınlığında xarici yük gəmisinə dron hücumu nəticəsində Azərbaycan vətəndaşları da xəsarət alıb.
Hadisə zamanı “Royad Məmmədov” adlı xarici yük gəmisinin heyətində olan 3 Azərbaycan vətəndaşı xəstəxanaya yerləşdirilib.
Bu barədə Azərbaycan Xarici İşlər Nazirliyinin Mətbuat xidməti məlumat yayıb.
Nazirlikdən bildirilib ki, hadisə ilə bağlı Azərbaycanın diplomatik nümayəndəlikləri, eləcə də aidiyyəti ölkələrin səlahiyyətli qurumları ilə koordinasiya işləri aparılır.
Hazırda əsas diqqət xəsarət alan Azərbaycan vətəndaşlarının tibbi vəziyyətinə və onlara zəruri yardımın göstərilməsinə yönəldilib.
XİN-in məlumatına görə, vətəndaşlara lazımi tibbi və konsulluq dəstəyi göstərilməsi istiqamətində tədbirlər görülür.
Hadisə nəticəsində Azərbaycan vətəndaşlarının da həlak olduğu bildirilir. Nazirlik onların cənazələrinin Azərbaycana gətirilməsi ilə bağlı müvafiq prosedurların həyata keçirildiyini açıqlayıb. Bundan başqa, itkin düşən Azərbaycan vətəndaşı ilə bağlı da tədbirlər görülür.
Beləliklə, Qara dənizdə yük gəmisinə edilən dron hücumu Azərbaycan vətəndaşlarının da həyatına birbaşa təsir edib. Hadisənin Rumıniya sahilləri yaxınlığında baş verməsi isə Qara dənizdə təhlükəsizlik məsələsinin yalnız münaqişə zonaları ilə məhdudlaşmadığını bir daha gündəmə gətirir.
Azərbaycan XİN-i hadisə ilə bağlı aidiyyəti qurumlarla əlaqəni davam etdirir və vətəndaşlara yardım göstərilməsi, həlak olanların cənazələrinin ölkəyə gətirilməsi istiqamətində iş aparır.
