Rumıniya prezidenti Nikuşor Dan qonşu Moldova ilə bağlı addımı ilə mübahisələrə səbəb olub. AzPost xəbər verir ki, G4media nəşrinin məlumatına görə, Dan Moldovanın 27 avqust – Müstəqillik Günü münasibətilə təbrik məktubu göndərməyib.
Məlumata əsasən, əslində təbrik məktubu hazırlanmışdı, lakin Kişinyova yollanmayıb. Nəşr yazır ki, bu, sıradan texniki məsələ deyil, siyasi qərardır. Prezident Dan hesab edir ki, Moldova Rumıniya ilə bir yerdə olmalıdır və müstəqilliyin qeyd olunması bu strategiya ilə uyğun gəlmir.
Məsələ ilə tanış mənbələrin iddiasına görə, bu yanaşma Kişinyovla da razılaşdırılıb. Bundan əlavə, Rumıniya prezidenti Moldovada keçirilən rəsmi bayram tədbirlərində də iştirak etməyib.
Xatırladaq ki, 27 avqustda Moldovanın müstəqillik günü münasibətilə ölkəyə Fransa prezidenti Emmanuel Makron, Almaniya kansleri Fridrix Mers və Polşanın baş naziri Donald Tusk səfər etmişdilər. Onların gəlişinin əsas məqsədi, prezident Maya Sandunun sözlərinə görə, ölkəyə “Rusiyanın müdaxiləsi fonunda dəstək göstərmək” olub.
