“Rusiya ABŞ-ı ən azı iki dəfə dağılmaqdan xilas edib. Lakin bu dəfə Vaşinqtona öz bütövlüyünü qorumağa kömək etmək məqsədəuyğun deyil”.
Azpost.info xəbər verir ki, bunu Rusiya Təhlükəsizlik Şurasının katibi Nikolay Patruşev bildirib.
“Rusiya ən azı iki dəfə ABŞ-ı xilas edib – Müstəqillik uğrunda savaşda və Vətəndaş müharibəsi illərində. Amma mən hesab edirəm ki, bu dəfə kömək etmək məqsədəuyğun deyil”, – Patruşev deyib.
O, əlavə edib ki, Rusiyanın çoxəsrlik mədəniyyəti mənəviyyat və mərhəmət üzərində qurulub. Rusiya həmişə ona müraciət edən hər bir xalqın suverenliyinin və dövlətçiliyinin müdafiəçisi kimi çıxış edib.
Patruşevə görə, Ağ Ev ölkədə sistemli böhran fonunda ABŞ vətəndaşlarını aldadır və manipulyasiya edir: “ABŞ vətəndaşlarının bir çox kateqoriyalarının hüquq və azadlıqlarının pozulması “demokratiya örtüyü” altında gizlədilir. Hətta ABŞ-ın keçmiş prezidenti Donald Tramp da ölkəsində söz və iradə azadlığından məhrum edilib”.
ABŞ-ın xarici siyasətindən danışan Patruşev bildirib ki, ona beynəlxalq dominantlığı saxlamaq istəyən iri Amerika korporasiyalarının sahibləri rəhbərlik edir.
Azpost.info
