Rusiya İrana Ukraynaya qarşı müharibədə istifadə etdiyi yüngül çoxməqsədli idarə olunan raketlər (LMUR) üçün 90 ədəd buraxılış qurğusu tədarük etməyə razılıq verib.
Bu barədə Financial Times Rusiya müdafiə sənayesi müəssisəsinin istehsal sənədlərinə istinadən məlumat yayıb.
Əldə olunan məlumatlara görə, 2024-cü ilin mayında raket və buraxılış sistemlərinin istehsalçısı olan “Vımpel” şirkəti Maşınqayırma Konstruktor Bürosuna (KBM) məktub göndərərək iki növ qurğu – APU-L və APU-305 üçün komponentlərin tədarükünün sürətləndirilməsini tələb edib.
Şirkət xəbərdarlıq edib ki, gecikmələr doqquz müqavilənin icrasının pozulması riski yaradır. Həmin müqavilələrdən ikisi xarici alıcılarla bağlanıb. Onlardan biri 192 ədəd APU-305 qurğusu sifariş edən Çin olub. İkinci alıcı isə sənədlərdə “K-10” kodu ilə göstərilib. Bu sifarişçiyə 90 ədəd APU-L qurğusunun satılması planlaşdırılıb. Rusiyanın digər müdafiə sənədlərində həmin kodun arxasında İranın dayandığı bildirilir.
Hər iki sistem “İzdeliye 305” adı ilə də tanınan LMUR raketlərinin buraxılması üçün istifadə olunur. Bu, kiçik və hərəkətdə olan hədəfləri vura bilən yüksək dəqiqlikli silahdır. Raket ilk dəfə 2021-ci ildə “Ordu” sərgisində nümayiş etdirilib, 2022-ci ildə isə Rusiya ordusunun silahlanmasına daxil edilərək Ukraynaya qarşı müharibədə tətbiq olunmağa başlanıb.
Buraxılış qurğuları helikopterlərdə yerləşdirilir. APU-L Mi-28 zərbə helikopterləri və modernləşdirilmiş Ka-52-lər üçün nəzərdə tutulub. Bu qurğu iki raket daşıya bilir, APU-305 isə bir raket üçün nəzərdə tutulub.
Sənədləri nəşrə təqdim edən Ukraynanın özəl kəşfiyyat təşkilatı Dallas Analytics-in nümayəndəsi bildirib: “Bu raket pilotsuz uçuş aparatından xeyli sürətlidir. Saniyədə təxminən 230 metr sürətlə hərəkət edərək 14 kilometrlik məsafəni təxminən bir dəqiqəyə qət edir”. Onun sözlərinə görə, operator uçuş zamanı LMUR raketini hədəfə yönəldə bilir.
Bununla belə, sənədlər İrana göndərilməsi nəzərdə tutulan buraxılış qurğularının sonradan həqiqətən istehsal edildiyini və sifarişçiyə təhvil verildiyini təsdiqləmir. Sifarişin mövcudluğu barədə məlumat da indiyədək açıq şəkildə yayılmayıb.
