Rusiya prezidenti Vladimir Putin Fransa lideri Emmanuel Makron və Almaniya kansleri Olaf Şoltsa telefonla danışıb.
Azpost.info xəbər verir ki, bu barədə Kreml məlumat yayıb. Məlumata görə, tərəflər Ukraynadakı hərbi əməliyyatın gedişini və Moskva ilə Kiyev arasında danışıqların vəziyyətini müzakirə ediblər.
Putin danışıqların Kiyevin günahı ucbatından dondurulduğunu deyərək Rusiyanın dialoqun bərpasına açıq olduğunu bildirib. Tərəflər qlobal ərzaq təhlükəsizliyinin təmin edilməsi sahəsində vəziyyətə də toxunublar. Putin ərzaq təminatındakı çətinlikləri Qərb ölkələrinin yanlış iqtisadi və maliyyə siyasətinin, eləcə də anti-Rusiya sanksiyalarının nəticəsi adlandırıb. Əlavə edib ki, Rusiya taxılın maneəsiz ixracına, o cümlədən Qara dəniz limanlarından Ukrayna taxılının ixracı variantlarının tapılmasına kömək etməyə hazırdır.
Azpost.info
