Texnologiya sahəsində fəaliyyət göstərən sahibkar və multimilyonçu Adam Robinson həyat yoldaşı və uşaqları ilə birlikdə ABŞ-ın Florida ştatında baş verən təyyarə qəzasında həlak olub.
“New York Post” qəzeti sahibkarın qardaşına istinadən xəbər verir ki, “Learjet 60” markalı biznes təyyarəsi Floridanın Palm-Biç dairəsində qəzaya uğrayıb. Təyyarədə olan 9 nəfərin hamısı həyatını itirib.
Qəza qurbanları arasında 44 yaşlı multimilyonçu və texnologiya şirkətinin rəhbəri Adam Robinson, həyat yoldaşı Helen Sharp, eləcə də onların azyaşlı övladları – 4 yaşlı Emma və 2 yaşlı Çarli də var.
İnternetdə qadın pilotun hava hərəkətini idarə edən dispetçerlərlə danışığının audioyazısı da yayımlanıb.
Pilot dispetçerlərə təyyarədə yüngül buzlanma və orta dərəcəli turbulentlik olduğunu bildirib. O, 11 kilometr yüksəklikdə uçuş üçün icazə istəyib. Lakin bir müddət sonra təcili yardım siqnalı göndərərək təyyarənin sürətlə hündürlük itirdiyini xəbər verib.
