Sentyabrın 11-də, bazar günü axşam Rusiya ordusu Ukraynanın ən böyük enerji stansiyası olan Xarkov İstilik-Elektrik Stansiyasına (İES) raketlə zərbə endirib.
Azpost.info bildirir ki, bu barədə Ukrayna Prezident Ofisinin sədrinin müşaviri Mixail Podolyak bəyan edib.
“Mülki infrastruktura birbaşa və bilərəkdən zərbə terrorçuluğun təzahürü və mülki vətəndaşları kütləvi şəkildə işıqsız və istiliksiz qoymaqdır. Düşmən döyüş meydanından qorxaqcasına qaçmağının “cavabı”nı belə verir“-deyə o vurğulayıb.
Xarkov İES elektrik gücünə görə, Ukraynada ikinci stansiya sayılır.
Prezident Zelenski bu hucumu şərh edərkən bildirib ki, bu terror cəhdidir. “Xarkov və Donetsk vilayətində enerji tam kəsilib. Zaporojye, Dneprpetrovsk və Sum vilayətləri qismən işıqsız qalıb. Rusiya terrorçuları kritik infrastrukturlar vururlar. Onların məqsədi insanları işıqsız və istiliksiz qoymaqdır”-deyə Prezident tvitterdə yazıb.
Bu axşam bütün Ukrayna ərazisində hava həyəcanı verilib. Bir neçə vilayətdə partlayışlar baş verib. Bundan sonra elektrik təchizatında ciddi problemlər yaranıb.
Xarkovun meri İqor Terexov bildirib ki, zərbə nəticəsində rayonların əksəriyyətində işıq yoxdur. Bunun nəticəsində nasoslar dayanıb və su kəsilib.
Azpost.info
