Rusiya Duması dövlət qulluqçularına xarici messencerlərdən şəxsi məqsədlər üçün istifadəyə qadağa tətbiq etmək istəyir.
Azpost.info xəbər verir ki, Dumanın Təhlükəsizlik Komitəsinin sədr müavini Anatoli Vıbornı belə bir təşəbbüslə baş nazirin müavini Dmitri Qriqorenkoya müraciət edib.
“Biz məxfi məlumatların sızmasının nəticələrinin ağır ola biləcəyi reallıqlarda yaşayırıq. Bu, xüsusilə rəsmi və digər məxfi sənədlərə çıxışı olan dövlət qulluqçuları üçün vacibdir”, – Vıbornı qadağanın zəruriliyini izah edib.
Onun sözlərinə görə, artıq başqa ölkələr də bu yolla gedib. O, misal kimi nazirlərə “WhatsApp” və “Teleqram”dan istifadənin qadağan edildiyi Fransanı göstərib.
Vıbornı həmçinin xatırladıb ki, müəyyən departamentlərdə və dövlət şirkətlərində məmurlara artıq “Apple” texnologiyasından imtina etmək tövsiyə olunub.
“Biz rəqəmsal təhlükəsizliyi gücləndirməliyik. Hücum edənlərə zərrə qədər şans verə bilmərik”, – deputat deyib.
Dumanın Təhlükəsizlik Komitəsi noyabr ayında aşağı palatanın cari işi haqqında məlumat yerləşdirən daxili Teleqram kanalının sındırılaraq məhv edildiyini bildirib. Bununla yanaşı, “WhatsApp” dövlət qulluqçuları arasında ən populyar ani messencerlərdən biri olaraq qalır.
Hazırda dövlət qulluqçuları xarici messencerlərdən şəxsi məqsədləri və işgüzar ünsiyyət üçün istifadə edə bilərlər. Lakin iyun ayında Duma dövlət və bələdiyyə xidmətlərinin göstərilməsi, banklar və dövlət şirkətləri tərəfindən mal və xidmətlərin satışı zamanı ödəniş sənədlərinin və fərdi məlumatların ötürülməsi üçün belə tətbiqlərdən istifadə edilməsinə görə 700 min rubla qədər cərimə nəzərdə tutan qanun qəbul etdi.
Azpost.info
