Rusiyada yerli hakimiyyət orqanları müharibə iştirakçılarına pulsuz torpaq ayıracaq.
Azpost.info xəbər verir ki, Rusiya prezidenti Vladimir Putin bununla bağlı göstəriş verib.
Qərar Moskva, Sankt-Peterburq və Sevastopol istisna olmaqla, bütün bölgələrə şamil edilir.
Pulsuz torpaqları Rusiya Qəhrəmanı adına layiq görülmüş və ya müharibə zamanı xidmətlərinə görə ordenlərlə təltif edilmiş hərbi qulluqçular, könüllülər və Milli Qvardiyanın əməkdaşları ala bilərlər. Söhbət dövlət və ya bələdiyyə mülkiyyətində olan torpaqlardan gedir.
Fərqlənmiş hərbi qulluqçuların və cəbhədə xəsarət və ya xəstəlik nəticəsində həlak olanların ailə üzvləri də bu torpaqlar üzərində mülkiyyət hüququna malikdirlər.
Torpaqların yaşayış yeri üzrə, yəni hərbi qulluqçuların müharibədə iştirakını başa vurduğu gün qeydiyyatda olduqları yaşayış məntəqələrində verilməsi təklif edilir.
Putin Moskva, Sankt-Peterburq və Sevastopolun hakimiyyət orqanlarına da hərbçilərə sosial dəstək üçün digər tədbirlər hazırlamağı tapşırıb.
Qeyd edək ki, dekabrın 19-da Putin Krım yarımadasına aid oxşar sərəncam imzalamışdı. İlkin mərhələdə Krım üzrə 700 torpaq sahəsinin paylanması planlaşdırılır.
Azpost.info
