“Lukoil”un Direktorlar Şurasının sədri Ravil Maqanovun intiharı son aylar Rusiyanın yüksək vəzifəli şəxləri arasında baş verən “müəmmalı ölümlər” silsiləsindəndir.
Azpost.info xəbər verir ki, bu, Rusiyanın neft-qaz sənayesi ilə bağlı ilin əvvəlindən bəri ən azı yeddinci ölümdür.
Yanvarda 60 yaşlı Leonid Şulman, fevralda isə 61 yaşlı Aleksandr Tyulyakov Sankt-Peterburq yaxınlığındakı evlərində asılmış vəziyyətdə tapılıblar. Hər ikisi “Qazprom”un strukturunda yüksək vəzifələrdə çalışıb və onların intihar məktubu buraxaraq özlərinə qəsd etdikləri deyilir.
Aprel ayında “Qazprombank”ın keçmiş vitse-prezidenti Vladislav Avayev, qızı və həyat yoldaşı Moskvada ölü tapılıb. İstintaqın məlumatına görə, Avayev əvvəlcə ailəsini, sonra isə özünü güllələyib. Onun həyat yoldaşına saatlarla işgəncə verdiyi bildirilir.
Avayevin keçmiş həmkarı, Ukraynaya qaçan İqor Volobuyev intihara inanmadığını və hadisənin səhnələşdirildiyini bildirib: “Bu hekayələrin hamısı qəribədir. Mən intihara inanmıram, ağılasığmazdır. İnanmaq çətindir ki, Avaev 13 yaşlı qızı, həyat yoldaşını güllələyib və intihar edib. Məncə, bu, səhnələşdirilmiş intihardır. Məncə, Avayev öldürülüb”.
Bir neçə gün sonra oxşar hadisə İspaniyada baş verib. “Novatek”in keçmiş top-meneceri Sergey Protosenya, həyat yoldaşı və qızı ölü tapılıb. Polis Protosenyanın həyat yoldaşını və qızını öldürə, sonra isə intihar edə biləcəyi versiyasını nəzərdən keçirib. Oğlu Fyodor daha sonra mətbuata bildirib ki, atası öz ailəsini öldürə bilməzdi.
İqor Volobuyev də bu ölümü müəmmalı adlandırıb: “O, guya hamını bıçaqlayıb və Lloret de Marda özünü asıb. Bu, Rusiyadan gələn mühacirlərin çox məskunlaşdığı kiçik bir İspaniya şəhəridir”.
İyul ayında Sankt-Peterburq ətrafında “Qazprom” üçün Arktika müqavilələri ilə məşğul olan “Astra Shipping” nəqliyyat təşkilatının rəhbəri Yuri Voronov güllələnərək öldürülüb. Növbəti müəmmalı intihar Ukrayna əsilli qaz maqnatı Mixail Uotfordun ölümü olub. O, Britaniyadakı mülkündə asılmış vəziyyətdə tapılıb.
Nəhayət, Ravil Maqanov bu gün səhər saatlarında Moskvada Mərkəzi Klinik Xəstəxananın 6-cı mərtəbəsindən özünü atıb. Maqanov xəstəxanada həyat yoldaşı ilə birgə müalicə olunurmuş. Həkimlər ona ürək xəstəliyi ilə yanaşı, depressiya diaqnozu da qoyublar. Hazırda hadisənin səbəbləri hüquq-mühafizə orqanlarının əməkdaşları tərəfindən araşdırılır.
Azpost.info
