“Rusiyanın Qarabağda qalmaq imkanları yoxdur”.
Azpost.info bildirir ki, bunu News.am-ə müsahibəsində “Regnum” Agentliyinin sabiq baş redaktoru, rusiyalı tarixçi Modest Kolerov deyib.
Onun sözlərinə görə, obrazlı ifadə olunsa sülhməramlılar Qarabağda quş hüququ” statusundadırlar. M.Kolerov bunu imkanların və mandatın olmaması ilə izah edib. Onun fikrincə bu mandat heç gələcəkdə də olmayacaq.
“Bakı sülhməramlılara mandat verməkdən imtina edib. Onların hazırkı mandatı uzadacağına əmin deyiləm”, – Kolerov bildirib.
Onun sözlərinə görə, mandat olmadan sülhməramlıların heç bir hərəkət legitim olmayacaq: “Əgər Ukraynada vəziyyət indi başa çatmaq üzrə, Kiyevin təslim olmasına yaxınlaşsaydı, Rusiyanın Qarabağ məsələsində mövqeyi güclənərdi. Amma bu hələ baş verməyib və gələn il də olmayacaq”.
M.Kolerov deyib ki, Rusiyanın Ermənistanda hərbi mövcudluğu uzun müddətdir ki, mənasını itirib. Çünki Moskvanın Cənubi Qafqazda maraqları Rusiyanın Abxaziya və Cənubi Osetiyadakı hərbi bazaları ilə tam təmin olunub.
“Rusiyanın Gümrü və Erebunidəki bazaları təcrid olunub, blokadaya alınıb və Ermənistan tərəfindən qeyri-dost siyasi mühitdədir. Onlar əhəmiyyətini xeyli vaxtdır itirib. Bu bazalar Rusiyanın maraqlarını qorumurlar, Paşinyanın əlində girovdurlar. Onların Ermənistan ərazisindən çıxarılması qaçılmazdır”, – Kolerov vurğulayıb.
Onun fikrincə, bu hadisələrdən sonra Türkiyənin nüfuzunun güclənməsi Rusiya üçün təhlükə yaratmır: “İqtisadi baxımdan Türkiyə çoxdandır Ermənistandadır. Qatar artıq gedib. Hərbi-siyasi təsirə gəlincə, Ermənistan artıq NATO-ya yönləndirmək istəyir. Beləliklə, Ermənistanın Türkiyə qarşısında NATO müttəfiqi olacaq”.
M.Kolerovun sözlərinə görə, Fransanın fəaliyyətinə gəlincə, o, ancaq özünü böyük dövlət kimi qələmə verir: “Bu ölkənin prezidenti, hətta Parisdə belə, qayda-qanun yarada, talanların qarşısını ala bilmir. O, Cənubi Qafqazda nə edə bilər? Heç nə”, – deyə Kolerov yekunlaşdırıb.
Azpost.info
