Şağan Reabilitasiya Pansionatında xəstələrə təqdim edilən yeməkxana xidmətində ciddi nöqsanlar müşahidə olunub.
AzPost-un əldə etdiyi məlumata görə, pasiyentlərdən biri müalicə aldığı müəssisədə təmizliyin vəziyyətindən narazı qalaraq prosedurlardan imtina edib.
Vətəndaş bildirib ki, pansionatın yeməkxanasında ona dəfələrlə çirkli çəngəl-bıçaq və yağlı ləkələrlə qalmış qab-qacaq təqdim olunub. İlk dəfə bu halı müşahidə edən pasiyent məsələni sakit şəkildə yeməkxana nəzarətçisinə çatdırsa da, ertəsi gün vəziyyət təkrar olunub. Onun sözlərinə görə, qablar sanki yalnız suya salınıb çıxarılır, lakin təmizlənmir.
Şikayətçi qeyd edib ki, növbəti dəfə eyni problemlə üzləşdikdə direktorun qəbuluna gedib. Lakin rəhbərliyin vədinə baxmayaraq, real tədbir görülməyib. Nəticədə pasiyent ərizə yazaraq müalicədən imtina edib və pansionatı tərk edib.
Vətəndaş həmçinin vurğulayıb ki, ölkədə müxtəlif xidmət sahələrində dəfələrlə oxşar vəziyyətlə rastlaşıb: “Getdiyim hər yerdə problem olur. Çalışıram haqqımı tələb edim, amma heç bir nəticə olmur. Əksinə, məni ‘deyingən’ kimi göstərirlər”.
O, sosial şəbəkə vasitəsilə dost-tanışa müraciət edərək ölkədən getmək, xaricdə işləmək üçün dəstək istəyib: “Əgər imkan olsa, Avropa, Amerika və ya başqa normal iş şəraiti olan ölkəyə gedim, başım dinc qalsın”.
Məsələ ilə bağlı pansionat rəhbərliyi hər hansı açıqlama verməyib.
