Moskva vilayətinin Mytişi şəhərində polis yük avtomobillərinin sürücülərini hədəf seçən dələduz dəstəsini ifşa edib.
AzPost xəbər verir ki, onlar əvvəlcədən zədələnmiş minik avtomobillərini qəsdən yük maşınlarının “kor zonalarına” daxil edərək toqquşma yaradırdılar. Hadisədən sonra isə sürücülərdən pul tələb edir və sığorta ödənişlərinə iddia qaldırırdılar.
Məlumata görə, dəstə 2024-cü ilin əvvəlindən etibarən ən azı altı belə yol-nəqliyyat hadisəsi təşkil edib. Onların qanunsuz yolla əldə etdiyi məbləğin iki milyon rubldan çox olduğu açıqlanıb. Lakin iki halda sürücülər pul ödəməkdən imtina ediblər.
Rusiya Daxili İşlər Nazirliyinin rəsmi nümayəndəsi İrina Volk bildirib ki, cinayətkar dəstənin beş üzvü saxlanılıb və onların barəsində cinayət işi açılıb.
