Sürücü
Rusiyada sentyabrın birindən avtomobil idarə etməyə tibbi məhdudiyyətlərlə bağlı yeni qaydalar qüvvəyə minəcək. AzPost bildirir ki, hökumətin bu qərarı hələ aprel ayında imzalansa da, dəyişikliklərin tətbiqi payızın əvvəlindən başlayacaq.
Yeni siyahıya əsasən, psixi pozuntular və görmə ilə bağlı bəzi xəstəlikləri olan şəxslərə sükan arxasına oturmaq qəti şəkildə qadağan ediləcək. Məsələn, şizofreniya, affektiv və stresslə bağlı pozuntular, şəxsiyyət və davranış pozuntuları, epilepsiya, rənglərin qavranılması anomaliyaları və ikigözlü korluq əsas məhdudiyyətlər sırasındadır.
Siyahı beynəlxalq xəstəliklər təsnifatı – MKB-10 əsasında dəqiqləşdirilib. Əvvəllər mövcud olan bəzi məhdudiyyətlər isə yumşaldılıb. Belə ki, qlaukoma, ürəyin işemik xəstəliyi, bronxial astma və süni göz bülluru olan şəxslərə şəxsi avtomobil idarə etməyə icazə verilir.
Qaydaların bəzi hallarda istisnaları var. Xəstəliyin növündən asılı olaraq, avtomobil yalnız xüsusi şərtlərlə idarə edilə bilər – məsələn, avtomatik sürətlər qutusu və ya əl ilə idarəetmə sistemi ilə təchiz edildikdə.
Ekspertlər bildirir ki, dəyişikliklərin böyük hissəsi mərkəzi sinir sistemi və psixi pozuntularla bağlıdır. Nevrologiya mütəxəssisi Natalya Suvorinovanın sözlərinə görə, parkinson kimi xəstəliklər tam sağalmadığı üçün belə xəstələrdə reaksiya ləngiməsi avtomobil idarəsini təhlükəli edir.
Əvvəlki qaydalarda yalnız ahromatopsiya qeyd olunmuşdusa, indi “rəng qavrama anomaliyaları” anlayışı ilə daha geniş formada təqdim edilib. Bu isə fərqli rəng pozuntularını nəzərə almağa imkan verir.
Yeni tələblər əsasən sürücülük vəsiqəsini dəyişəcək şəxslərə aid olacaq. Mövcud vəsiqəsi olan sürücülərə isə əlavə tibbi müayinədən keçmək tələb olunmur. Beləliklə, dəyişikliklər əksər sürücülərin gündəlik həyatına ciddi təsir göstərməyəcək.
