Martın 11-də Qafqaz Müsəlmanları İdarəsinin sədri şeyxülislam Allahşükür Paşazadə ölkəmizdə səfərdə olan ABŞ-ın “İsa Məsih Son Günlərin Müqəddəsləri Kilsəsi” rəhbərliyinin nümayəndəsi, Ağsaqqal Cak Cerardı və kilsənin Mərkəzi Avropa nümayəndəsi Pol Pikardı qəbul edib.
Bu barədə QMİ mətbuat xidməti məlumat verib.
Cənab Cak Cerard Şeyxülislam Allahşükür Paşazadənin simasında kilsə rəhbərliyi adından bütün Azərbaycan müsəlmanlarını müqəddəs Ramazan ayı ilə əlaqədar təbrik etdi və xoş arzularını dilə gətirdi. Amerikalı qonaq Azərbaycana bir daha səfər etməkdən, ölkəmizdə hər zamanki kimi səmimiyyət və qonaqpərvərliklə qarşılanmaqdan böyük məmnuniyyət duyduğunu ifadə edib.
Şeyxülislam həzrətləri qonaqları “İsa Məsih Son Günlərin Müqəddəsləri Kilsəsi”nin ölkəmizdə qeydiyyatdan keçməsi və Azərbaycanın dinlərarası ailəsinə qoşulması münasibətilə təbrik edib. 2022-ci ildəki Yuta səfərini və orada kilsənin rəhbərliyi ilə görüşlərini məmnuniyyətlə xatırlayan QMİ sədri “İsa Məsih Son Günlərin Müqəddəsləri Kilsəsi”nin prezidenti cənab Nelsona və kilsə rəhbərliyinə öz salam-dualarını göndərib.
Tərəflər qarşılıqlı əlaqələrin uğurla inkişaf etdiyini vurğulayaraq ikitərəfli əməkdaşlığın yeni perspektivlərini müzakirə ediblər. Cənab Cerard qeyd etdi ki, kilsə rəhbərliyi Şeyxülislam həzrətlərini cari ilin payızında öz ənənəvi ümumi yığıncağında fəxri qonaq qismində görmək arzusundadır və bununla bağlı QMİ sədrinə müvafiq dəvət məktubu ünvanlayacaq. Şeyxülislam həzrətləri bu təşəbbüsə görə öz təşəkkürlərini bildirib.
Görüşdə Bakı Beynəlxalq Multikulturalizm Mərkəzinin icraçı direktoru R.Həsənov və Azerbaycan Respublikasının Dini Qurulmarla İş üzrə Dövlət Komitəsinin nümayəndəsi A.Cavadov iştirak edib.
