Şeyxülislam Səudiyyə Ərəbistanına səfərə gedib

Qafqaz Müsəlmanları İdarəsinin (QMİ) sədri şeyxülislam Allahşükür Paşazadə mayın 10-da Səudiyyə Ərəbistanına səfər edəcək.

QMİ-nin mətbuat xidmətindən bildiriblər ki, Məkkəyə səfərdən əvvəl şeyxülislam A.Paşazadə Ulu Öndərin anadan olmasının 99-cu ildönümündə Fəxri xiyabanı ziyarət edərək Heydər Əliyevin məzarı başında onun əziz xatirəsini yad edib, ruhuna dualar oxuyub.

Daha sonra Ulu Öndərin ömür-gün yoldaşı, görkəmli oftalmoloq-alim, akademik Zərifə xanım Əliyevanın xatirəsini yad edərək məzarı başında ruhunu xatirəsini anıb.

Məkkə və Mədinədə Ümrə ziyarəti həyata keçirəcək şeyxülislam A.Paşazadə şəhidlərimizi yad edəcək, Allahdan onlara rəhmət diləyəcək, ruhları üçün dualar edəcək.

Səudiyyə Ərəbistanına səfər çərçivəsində şeyxülislam A. Paşazadə İslam Aləmi Liqasının – Rabitə təşkilatının mayın 11-də Krallığın paytaxtı Ər-Riyadda “Dinlərin davamçılarının ortaq dəyərləri” mövzusunda keçirəcəyi beynəlxalq konfransda iştirak edəcək. Tədbirdə sülhə, dinlərarası və sivilizasiyalararası dialoqun müasir problemləri, müxtəlif dinlərin sülh və harmoniyaya böyük töhfələr verə biləcək ortaq dəyərləri müzakirə olunacaq. İslam Aləmi Liqasının Baş katibi Əbdülkərim Əl-İsanın dəvət məktubunda bu sahədə “töhfələr verəcək şəxslərin öncüllərindən” kimi dəyərləndirdiyi QMİ sədri şeyxülislam A. Paşazadə konfransda məruzə ilə çıxış edəcək.

Səudiyyə Ərəbistanın Kralı, İki Müqəddəs Ocağın Xadimi Əlahəzrət Salman bin Əbdüləziz Al Səud və Vəliəhd – Məhəmməd bin Salmanın beynəlxalq konfrans iştirakçıları ilə görüşü nəzərdə tutulur.

Əvvəlki məqalə

“Şuşada konsulluğun açılması ilə bağlı danışıqlar aparır” –

Sonrakı məqalə

Sabaha olan hava proqnozu