Ukraynada müharibənin başa çatdırılması ilə bağlı danışıqlar Kiyevin Rusiyanın tələb etdiyi ərazilər üzrə güzəştlərə razı olmaq istəməməsi səbəbindən dalana dirənib.
Bu barədə ABŞ Prezidentinin xüsusi nümayəndəsi Cared Kuşner sentyabrın 12-də Kiyevdə keçirilən illik YES forumunda çıxışı zamanı bildirib.
Məlumatı “Ukrainskaya Pravda” yayıb.
Kuşnerin sözlərinə görə, Vaşinqton sülh sazişinin əsas hissəsini artıq hazırlayıb, lakin Ukraynanın ərazi məsələsi üzrə şərtlərlə razılaşmaması sənədin imzalanmasını ləngidir.
“Prezident Putin nəyə nail olmaq istədiyini və xəttini müəyyənləşdirib. Əgər Ukrayna bu xəttə qədər geri çəkilməyə razı olsaydı, sazişin qalan hissəsi artıq hazır olardı. Lakin Ukrayna hazırda bunu etmək istəmir”, – Kuşner deyib.
Onun sözlərinə görə, ABŞ vasitəçilərinin əsas vəzifəsi Ukraynanın mövqeyinə zidd olmayan, eyni zamanda münaqişənin başa çatmasına imkan verəcək və gələcəkdə onun yenidən başlamasının qarşısını alacaq “kreativ həll” tapmaqdır.
Kuşner bildirib ki, ərazi məsələsi cəbhədəki vəziyyət nəzərə alınmaqla həll edilməlidir. Vasitəçilərin vəzifələrindən birinin münaqişənin dondurulmasına imkan verəcək variant tapmaq olduğunu deyib.
Moskva və Kiyevin mövqeyindən danışan Kuşner hər iki tərəfin “çox ağrı çəkdiyini” və müharibəni başa çatdırmaq əzmi nümayiş etdirdiyini bildirib.
Onun sözlərinə görə, Rusiya hazırda mümkün nizamlanma variantını müzakirə etməyə hazır olduğunu bildirir, Ukrayna Prezidenti Volodimir Zelenski də münaqişənin başa çatdırılmasına köklənib.
“Sadəcə olaraq hamını qane edəcək düzgün formul tapmalıyıq”, – amerikalı nümayəndə bildirib.
Kuşner Kiyevə tez-tez gəlmək istəmir
Kuşner çıxışında Rusiyanın münaqişəyə başlamasına görə məsuliyyət məsələsinə demək olar ki, toxunmayıb. O, əsas diqqəti döyüşlərin dayandırılması və müharibədən sonrakı iqtisadi inkişaf perspektivlərinə yönəldib.
O, müharibə başa çatdıqdan sonra biznes maraqlarına və iqtisadi rifaha daha çox diqqət yetirilməsini təklif edib.
Kuşnerin Kiyevdə çıxışı zamanı Rusiyanın növbəti hücumu ilə əlaqədar hava hücumu siqnalı verilib.
ABŞ nümayəndəsindən Ukraynaya dəstək göstərmək və hava zərbələrinin dayandırılmasına yardım etmək üçün Kiyevə mütəmadi səfərlər edib-etməyəcəyi soruşulub.
Kuşner isə məsafədən işləməyə üstünlük verdiyini bildirib:
“Biz nümayişkaranə diplomatiyanın tərəfdarı deyilik. Lazım olanı telefonla və ya Zoom vasitəsilə edirik. Mən sülh bərqərar olanda gəlmək istərdim”.
ABŞ danışıqları yaxınlaşdırmağa çalışır
Sentyabrın 6-da ABŞ Prezidenti Donald Trampın xüsusi nümayəndəsi Stiv Uitkoff Kiyev və Moskvaya səfər edən Amerika nümayəndə heyətinin məqsədinin tərəflərin mövqelərini yaxınlaşdırmaq olduğunu bildirib.
Həmin gün Zelenski üç raund danışıqlar keçirildiyini və onların məzmunlu olduğunu açıqlayıb. Onun sözlərinə görə, görüşlərdə müharibənin başa çatdırılmasının mümkün parametrləri və Ukraynaya qısamüddətli dəstək məsələləri müzakirə edilib.
Kuşner daha əvvəl Ukraynada müharibənin qışa qədər başa çatmasının zəmanət altında olmadığını bildirsə də, ABŞ tərəfinin bu məqsədə nail olmaq üçün şərait yaratmaq üzərində işlədiyini söyləyib.
