Nvidia şirkətinin baş direktoru Censen Huang süni intellektin inkişafının yaxın illərdə bəşəriyyətin məhvinə gətirib çıxara biləcəyi ilə bağlı xəbərdarlıqları şişirdilmiş hesab edir.
Azpost.info -nun məlumatına görə, o, CBS News telekanalına müsahibəsində bildirib ki, bu cür proqnozların kifayət qədər elmi əsası yoxdur və insanları yalnız səbəbsiz yerə qorxudur.
“2030-cu il dünyanın sonu olmayacaq. Bunun dünyanın sonu olması ehtimalı sıfırdır”, – deyə Huang CBS News müxbiri Co Linq Kentə bildirib.
Onun sözlərinə görə, “insanları lazımsız yerə qorxutmaq məsuliyyətsizlikdir”.
“Bu, elmi əsaslara söykənmir”
Huang bu fikirləri Anthropic şirkətinin keçmiş tədqiqatçısı Ceykob Koksonun son açıqlamalarına münasibət bildirərkən səsləndirib.
Kokson süni intellekt hazırlayan şirkətlərin texnologiyanın bu onilliyin sonuna qədər bəşəriyyəti məhv edə biləcəyi ssenarisini ciddi şəkildə nəzərdən keçirdiklərini yazmışdı.
Bu açıqlamalar süni intellektin potensial riskləri ilə bağlı geniş müzakirələrə səbəb olub. Müzakirələr fonunda Anthropic rəhbəri Dario Amodei və OpenAI rəhbəri Sem Altman da ən güclü AI modellərinin inkişafının müəyyən qədər yavaşladılmasının tərəfdarı olduqlarını bildiriblər. Məqsəd təhlükəsizlik sistemlərinin süni intellektin imkanlarının sürətli inkişafına çatmasını təmin etməkdir.
Huang isə bu yanaşma ilə razılaşmır. O, bəşəriyyətin yaxın zamanda məhv olacağı ilə bağlı proqnozları “qiyamət ssenariləri” adlandırır və onların elmi məlumatlara əsaslanmadığını bildirir.
Bununla belə, Nvidia-nın süni intellektin inkişafında birbaşa kommersiya marağı var. Şirkətin istehsal etdiyi çiplər iri dil modellərinin hazırlanması və işlədilməsi üçün istifadə olunur. AI hesablama avadanlığına tələbatın sürətli artması Nvidia-nı bazar dəyərinə görə dünyanın ən böyük şirkətinə çevirib.
Jurnalistin “bu kommersiya maraqları fonunda ictimaiyyət niyə onun AI təhlükəsizliyi ilə bağlı qiymətləndirmələrinə inanmalıdır?” sualına Huang cavab verib ki, Nvidia özü də texnologiyanın təhlükəsiz istifadəsində maraqlıdır.
“Şirkətimizin uğuru məhsul və xidmətlərin təhlükəsiz tətbiqi ilə birbaşa bağlıdır”, – deyə o bildirib.
Huangın sözlərinə görə, sənaye bu prosesi məsuliyyətlə davam etdirməsə, Nvidia-nın dəyəri də aşağı düşə bilər.
Huang süni intellekt üçün yeni qanunların lazım olduğunu düşünmür
Son aylarda bir sıra avtonom sistemlərlə bağlı insidentlərdən sonra süni intellektin tənzimlənməsi məsələsi daha da aktuallaşıb.
OpenAI öz modellərinin gözlənilməz davranış nümayiş etdirdiyi hallar barədə məlumat verib. Bundan əvvəl isə şirkətin modelləri ilə əlaqəli agentlərin AI şirkəti Hugging Face-ə qarşı kiberhücumda iştirak etdiyi bildirilmişdi. Bu fonda bəzi amerikalı qanunvericilər AI hazırlayan şirkətlər üzərində nəzarətin gücləndirilməsini təklif edirlər.
Huang isə hesab edir ki, ABŞ-da şirkətləri vurulan zərərə, kibertəhlükəsizlik pozuntularına və icazəsiz girişlərə görə məsuliyyətə cəlb etməyə imkan verən qanunlar artıq mövcuddur. O, ABŞ Prezidenti Donald Trampın sənayeyə əlavə məhdudiyyətlərin tətbiq edilməsinin vacib olmadığı barədə mövqeyi ilə də razılaşıb.
Huangın fikrincə, əvvəlcə mövcud qanunlar tətbiq edilməli, bəşəriyyətin məhv olmaq təhlükəsi ilə bağlı müzakirələr isə bu qaydalardan imtina üçün əsas kimi istifadə edilməməlidir.
Nvidia ABŞ və Çin arasında
Huang müsahibədə ABŞ və Çin arasındakı texnoloji rəqabətə də toxunub.
Vaşinqton süni intellekt sistemlərinin yaradılmasında istifadə olunan ən güclü Amerika çiplərinin Çinə satışını məhdudlaşdırır. Bununla yanaşı, Tramp administrasiyası daha əvvəl Nvidia-ya H200 də daxil olmaqla bəzi hesablama sürətləndiricilərini Çində təsdiqlənmiş müştərilərə satmağa icazə verib.
Huang hesab edir ki, Amerika texnologiyaları ilk növbədə ABŞ-a fayda verməlidir. Bununla yanaşı, o, texnologiyaların ixracına genişmiqyaslı qadağaların tətbiq edilməsinə qarşı çıxır. “Çip istehsal edən hər bir şirkət bütün dünyaya xidmət göstərməli və bütün dünya üçün rəqabət aparmalıdır”, – Nvidia rəhbəri deyib.
O, Çin Prezidenti Si Cinpin ilə süni intellektin inkişafı üzrə beynəlxalq standartları müzakirə etmək istədiyini də bildirib. Huangın sözlərinə görə, ABŞ və Çinin AI-nin iqtisadi inkişafı dəstəkləməsində ümumi maraqları var. Lakin milli təhlükəsizlik və müdafiə ilə bağlı bəzi sahələrdə əməkdaşlıq mümkün deyil.
Huang data mərkəzləri ilə bağlı narazılığı etiraf etdi
Nvidia rəhbəri ABŞ-da data mərkəzlərinin tikintisinə qarşı artan narazılıqdan da danışıb. Bir sıra regionlarda yerli sakinlər yeni data mərkəzlərinin enerji sistemlərinə və infrastruktura təsirindən narahat olaraq onların tikintisinə qarşı çıxırlar.
Huang etiraf edib ki, sənaye bu layihələrlə bağlı yerli icmalarla daha əvvəl danışmalı idi. “Biz gəlib sizinlə daha əvvəl danışmalı idik”, – deyə o bildirib. Onun sözlərinə görə, şirkətlər tikintiyə başlamazdan əvvəl yerli sakinlərlə əlaqə saxlamalıdır. Huang müasir data mərkəzlərinin daha enerji səmərəli olduğunu və daha az su tələb etdiyini bildirib. Onun sözlərinə görə, belə obyektlərin tikintisi yeni iş yerləri yarada və yerli iqtisadiyyatı stimullaşdıra bilər.
“Mən vergi ödəməkdən qorxmuram, sadəcə kasıb olmaqdan qorxuram”
Huang müsahibədə vergilər məsələsinə də toxunub. Bloomberg onun sərvətini 182 milyard dollar qiymətləndirir. Kaliforniyada bu ilin payızında sərvəti 1 milyard dollardan çox olan şəxslərə birdəfəlik 5 faizlik vergi tətbiq edilməsi təklifinə səsvermə keçiriləcək.
Huang belə bir tədbir qəbul olunarsa, əlavə vergi ödəməyə etiraz etməyəcəyini bildirib. Onun sözlərinə görə, beş il ərzində 8 milyard dollar vergi ödəmək imkanı “imtiyaz və məsuliyyətdir”. “Mən vergi ödəməkdən qorxmuram – sadəcə kasıb olmaqdan qorxuram”, – Nvidia rəhbəri zarafat edib.
Huang özünü “Amerika arzusunun təcəssümü” adlandırıb. O, karyerasının əvvəlində Denny’s restoranında qab yuyan işlədiyini və məhz həmin dövrdə öz texnologiya şirkətini yaratmaq barədə düşünməyə başladığını deyib.
Huang bildirib ki, o vaxt Nvidia-nın bir gün sürətlə inkişaf edən süni intellekt sənayesinin mərkəzində olacağını təsəvvür edə bilməzdi.
N.Talıblı
