Tayvan Müdafiə Nazirliyi yaxın üç il ərzində pilotsuz uçuş aparatlarına qarşı 600-dən çox yüngül müdafiə sistemi əldə etməyi planlaşdırır. AzPost “Taipei Times” qəzetinə istinadla xəbər verir ki, layihənin dəyəri təxminən 9,7 milyard Tayvan dolları, yəni 312 milyon ABŞ dolları həcmində qiymətləndirilir.
Məlumata görə, layihənin həyata keçirilməsi üçün Tayvan parlamentinin razılığı tələb olunur. Müdafiə Nazirliyi bildirir ki, bu sistemlər dronları aşkar etməli, onlara maneələr yaratmalı, həmçinin naviqasiya siqnallarını çaşdırmaq imkanına malik olmalıdır.
Hazırlanacaq qurğuların yüngül və daşınması asan olması əsas şərtlərdən biridir. Belə sistemlərin quraşdırılması 15 dəqiqədən artıq çəkməməlidir.
Yeni texnologiyanın əsas məqsədi dörd kilometrlik radiusda ondan çox dronu eyni vaxtda aşkarlamaqdır.
Layihədə iştirak etmək istəyən şirkətlərdən ilkin mərhələdə 242 ədəd sistemin yarım il ərzində sınaq üçün təhvil verilməsi tələb olunur. Daha sonra, sınaqlardan uğurla keçdikdən sonra, əlavə 393 ədəd sistemin 180 gün ərzində çatdırılması nəzərdə tutulur.
Tayvan hakimiyyəti son illərdə regionda artan təhlükəsizlik riskləri fonunda müdafiə qabiliyyətini gücləndirməyə xüsusi diqqət yetirir. Yeni anti-dron sistemlərinin alınması da bu strategiyanın bir hissəsi hesab olunur.
