“ABŞ Nümayəndələr Palatasının sədri Nensi Pelosinin Tayvana mümkün səfəri Pekin və Vaşinqton arasında münasibətlərə xələl gətirəcək”.
Azpost.info xəbər verir ki, Çinin BMT-dəki daimi nümayəndəsi Çjan Tszyun deyib.
“Belə səfər Çinin bölünməzliyi prinsipini, suverenliyini və ərazi bütövlüyünü pozur, Tayvan boğazında sabitlik və sülhə, üstəlik, Çin və ABŞ arasında münasibətlərə xələl gətirir”, – diplomat bildirib.
O, əmin olduğunu bildirib ki, Birləşmiş Ştatların hakimiyyət orqanları bu səfərin bütün nəticələri ilə üzləşməli olacaqlarını yaxşı bilirlər.
Ötən gün Ağ Evin Milli Təhlükəsizlik Şurasının Strateji Kommunikasiyalar üzrə koordinatoru Con Kirbi Pelosinin Tayvana səfər etmək hüququna malik olduğunu bildirsə də, spikerin Tayvana gedəcəyini təsdiqləməyib.
Tayvan mediası isə Pelosinin avqustun 2-də axşam Tayvana uça biləcəyi barədə məlumat verib.
Qeyd edək ki, Tayvan məsələsi 1949-cu ildən – kommunist Çin Xalq Respublikası elan edildikdən və hakim Kuomintang Partiyasının bir hissəsi Tayvanda hakimiyyəti qurduqdan sonra açıq qalır. Pekin “vahid Çin prinsipi”ndə israr edir və bildirir ki, Tayvan Çinin ayrılmaz hissəsidir.
Azpost.info
