Tesla
ABŞ-ın Kaliforniya ştatında yerləşən Fremont zavodunda kamuflyaj örtüyü ilə gizlədilmiş naməlum “Tesla” avtomobili görüntülənib. AzPost xəbər verir ki, “Electrek” nəşri bu görüntüləri yayımlayıb və hadisə yeni model ehtimallarını gücləndirib.
Pilotu olmayan avtomobilin ön və arxa hissəsinin gizlədilməsi, müşahidəçilər arasında onun ya sadələşdirilmiş Model Y, ya da yenilənmiş “Model Y Performance” ola biləcəyi ilə bağlı fərziyyələrə səbəb olub. Bəzi mütəxəssislər hesab edir ki, bu prototip “Tesla”nın daha əlçatan qiymətli avtomobil strategiyasının bir hissəsidir.
Kamuflyaj istisna olmaqla, avtomobilin ümumi dizaynı hazırda satışda olan Model Y ilə böyük ölçüdə oxşardır. Bu da onun tamamilə yeni bir modeldən çox, mövcud versiyanın təkmilləşdirilmiş variantı olduğunu göstərir.
Qeyd edək ki, Model Y “Tesla”nın ən çox satılan modellərindən biridir və bu il qlobal satışlarda büdcəli Model 3-dən belə irəlidə qərarlaşıb. Kompakt elektrik SUV olan Model Y, Volkswagen Touareg və Lexus RX kimi avtomobillərlə rəqabət aparır və 2020-ci ildən istehsal olunur.
“Tesla”dan isə məsələ ilə bağlı hələlik rəsmi açıqlama verilməyib.
