Qrafik prosessorların hazırlanması üzrə dünya liderlərindən biri olan Nvidia və süni intellekt əsasında kənd təsərrüfatı robotlarının tərtibçisi Carbon Robotics şirkəti “robot-fermer” hazırlayıblar. Bu, fermerlərə alaq otlarına qarşı mübarizədə kömək edən LaserWeeder G2 robotudur.
AzPost “Techkult” portalına istinadən xəbər verir ki, bu traktorla çəkilən qurğu hər birinin gücü 240 Vt olan 24 diod lazerdən istifadə etməklə alaq otlarının müəyyən edilməsi və məhv edilməsi üçün 36 yüksək ayırdetmə kamerasına malikdir.
Son yeddi il ərzində 14 ölkədə yüzlərlə fermer artıq bu “terminatorun” xidmətindən istifadə edib.
Robot bir dəqiqədə 10.000 və ya bir saatda 600.000 alaq otu ilə mübarizə aparmaq gücündədir. O, saatda 2 hektardan 4 hektara qədər emal etmək üçün nəzərdə tutulub. Bu da 75 nəfərlik briqadanın imkanlarını əvəz edir. LaserWeeder G2- alaq otlarının 99%-ni məhv edir.
LaserWeeder G2 herbisidlərlə müqayisədə danılmaz üstünlüklərə malikdir. Birincisi, yüksək dəqiqlikli robot daha təhlükəsizdir, ikincisi, alaq otları bu mübarizə formasına adaptasiya olunmur.
