ABŞ-nin Ukraynaya silah tədarükü Co Baydenin prezidentliyi dövrü ilə müqayisədə təxminən beş dəfə azalıb.
Bu, ABŞ Konqresi üçün hazırlanmış və RIA Novosti agentliyinin təhlil etdiyi hesabatda əksini tapıb.
Hesabata görə, 2022-ci ilin martından 2024-cü ilin dekabrınadək Vaşinqton Kiyevə ümumilikdə 43,4 milyard dollar həcmində hərbi yardım göstərib.
Bu məbləğin 32,25 milyard dolları Pentaqonun ehtiyatlarından ayrılıb, 11,15 milyard dolları isə USAI proqramı çərçivəsində müdafiə sənayesi müəssisələrinə ödənilib.
Beləliklə, əvvəlki administrasiya 34 ay ərzində Ukraynaya orta hesabla ayda 1,28 milyard dollar həcmində hərbi yardım təmin edib.
Ağ Evdə hakimiyyət dəyişikliyindən sonra isə ABŞ Müdafiə Nazirliyinin ehtiyatlarından silah tədarükü dayandırılıb. Bu çərçivədə son yardım paketi 2025-ci il yanvarın 9-da elan olunub. Həmin vaxtdan etibarən silah tədarükü yalnız əvvəllər bağlanmış uzunmüddətli USAI müqavilələri əsasında həyata keçirilir.
2026-cı ilin birinci rübündə müdafiə şirkətlərinə 797 milyon dollar ödənilib ki, bu da ayda orta hesabla 266 milyon dollar deməkdir. Bu göstərici Bayden dövründəki orta aylıq yardım həcmindən təxminən beş dəfə azdır.
Bundan əvvəl yayılan məlumatlara görə, Ağ Evdə keçirilən görüş zamanı Ukrayna Prezidenti Volodimir Zelenski ABŞ Prezidenti Donald Trampdan qış mövsümünə qədər “Patriot” hava hücumundan müdafiə sistemləri üçün 300 zenit raketi göndərilməsini xahiş edib.
Mənbələrin bildirdiyinə görə, bu müraciət iki ölkə liderinin ikitərəfli görüşü zamanı səsləndirilib.
