ABŞ Rusiya və Ukrayna
Donald Tramp administrasiyasının Ukrayna üçün sülh planındakı təkliflərlə Kiyevin qəbul etməyə hazır olduqları arasında əhəmiyyətli fərqlər var.
AzPost bildirir ki, bu barədə CNN danışıqlarla tanış olan yüksək vəzifəli Ukrayna mənbəsinə istinadən məlumat verib.
Onun sözlərinə görə, planın 28 bəndinin əksəriyyətində konsensus əldə edilib. Lakin tərəflərin əhəmiyyətli dərəcədə fərqləndiyi ən azı üç məsələ var: Ərazi, Ukrayna Silahlı Qüvvələrinin ölçüsü və NATO üzvlüyü.
Buraya, xüsusən də Donbasdakı bir neçə əsas ərazinin Moskvanın nəzarətinə verilib-verilməyəcəyi daxildir. ABŞ əvvəllər Ukraynanın orada Rusiya tərəfindən idarə olunan silahsızlaşdırılmış zonanın yaradılmasına razılıq verməsini təklif etmişdi. Ukraynalı mənbə CNN-ə bildirib ki, bu təkliflə bağlı “müəyyən irəliləyişlər” əldə edilib, lakin yekun qərar qəbul edilməyib.
Bundan əlavə, ABŞ-ın Ukrayna Silahlı Qüvvələrinin sayını 600.000 nəfərlə məhdudlaşdırmaq təklifi müzakirə olunur. Kiyev hələ bu ideyanı təsdiqləməyə hazır deyil.
Nəhayət, Ukrayna NATO üzvü olmaq perspektivlərindən imtina etmək istəmir. Mənbə qeyd edib ki, belə bir güzəşt “pis presedent” yaradacaq və Rusiyaya “üzv olmadığı” bir alyansa yeni namizədlərin qəbul edilməsinə veto qoymaq səlahiyyəti verəcək.
Kanal bildirib ki, hər üç məqam Ukrayna üçün “qırmızı xətlər”dir, lakin Moskva üçün fundamentaldır.
Daha əvvəl Ukrayna Prezident Aparatı rəhbərinin müşaviri Mixaylo Podolyak DW-yə verdiyi müsahibədə ABŞ prezidentinin sülh planının danışıqlar zamanı qismən dəyişdirildiyini və “bəzi həssas məsələlərin ayrı bir məcraya köçürüldüyünü” təsdiqləmişdi.
Ukrayna Prezident Aparatının rəhbəri Andrey Yermak Axios-a bildirib ki, Zelenski müharibəyə son qoymaq üçün birgə plan barədə razılığa gəlmək üçün bu həftə Trampla şəxsən görüşməyə ümid edir.
