ABŞ prezidenti Donald Tramp Nobel Sülh Mükafatı uğrunda mübarizədə həddindən artıq irəli gedib, o Nobel Komitəsinə təzyiq göstərməyə cəhd edib.
AzPost bildirir ki, bu barədə Financial Times xəbər verir.
Nəşr Oslodakı Sülh Araşdırmaları İnstitutunun direktoru Nina Qregerdən sitat gətirib: “Tramp Nobel Komitəsinə təzyiq edir. O, “Mən bu mükafatı istəyirəm, çünki layiqli namizədəm” deyir. Bu, çox da sülhsevər yanaşma deyil”.
Məqalədə qeyd edilir ki, Tramp Norveç hökumətinə də təzyiq edib. Norveç rəsmiləri iddia edirlər ki, ABŞ prezidenti mükafatı ən azı bir telefon danışığında – Xəzinədarlıq rəhbəri və NATO-nun keçmiş baş katibi Yens Stoltenberqlə söhbətdə bunu qeyd edib.
“Bundan başqa, Oslo Trampın qalib gəlmədiyi təqdirdə tariflər və ya digər sanksiyalarla cavab verə biləcəyindən qorxur”, – məqalədə deyilir.
Bloomberg daha əvvəl bildirmişdi ki, ABŞ prezidentinin köməkçiləri Trampa Nobel Sülh Mükafatı vermək üçün aqressiv “pərdəarxası” kampaniya aparırlar. Xüsusilə də Trampın xüsusi nümayəndəsi Steven Witkoff və ABŞ dövlət katibi Marko Rubio bu kampaniya üçün lobbiçilik edirlər.
Qeyd edək ki, oktyabrın əvvəlində Tramp Nobel Sülh Mükafatını qazanmaq arzusunda olmadığını bildirmişdi. Bununla belə, ABŞ prezidenti əlavə edib ki, o, Hindistan və Pakistan ətrafında eskalasiya da daxil olmaqla, yeddi hərbi münaqişəni dayandırıb.
Nobel Sülh Mükafatının elan edilməsi mərasimi oktyabrın 10-na təyin edilib.
