ABŞ Prezidenti Donald Trampın çərşənbə axşamı Vaşinqtonda Ukrayna Prezidenti Volodimir Zelenski ilə görüşəcəyi gözlənilir.
Bu barədə Ağ Evin nümayəndəsi məlumat verib.
Ukraynalı mənbənin Reuters agentliyinə bildirdiyinə görə, Zelenski ABŞ-a səfərdə maraqlıdır. Lakin onun komandası hələ də Ağ Evdən rəsmi təsdiqin verilməsini gözləyir.
Mənbənin sözlərinə görə, Ukrayna və ABŞ rəsmiləri Rusiyaya təqdim olunacaq yeni sülh təşəbbüsləri çərçivəsində hava məkanında atəşkəs təklifini müzakirə ediblər. Bu təşəbbüsün məqsədi 2022-ci ildə Rusiyanın Ukraynaya genişmiqyaslı hərbi müdaxiləsi ilə başlayan müharibənin dayandırılmasına nail olmaqdır.
Bildirilib ki, Ukrayna daha əvvəl də Rusiya Prezidenti Vladimir Putinə atəşkəslə bağlı təkliflər təqdim edib. Lakin həmin təşəbbüslər Moskva tərəfindən qəbul edilməyib.
Mənbə qeyd edib ki, bəzi rəsmilər Ukraynanın pilotsuz uçuş aparatları və raket zərbələrinin Rusiya iqtisadiyyatına təzyiqi artırdığını düşünür. Onların fikrincə, bu amil gələcəkdə Kremlin mövqeyinin yumşalmasına təsir göstərə bilər.
