Mütəxəssislər mobil telefonun tualetə aparılması vərdişinin sağlamlıq üçün ciddi risklər yaratdığını açıqlayıb.
AzPost bildirir ki, son tibbi araşdırmalara görə, bu vərdişlə yaşayan insanlarda babasil xəstəliyinin yaranma ehtimalı əhəmiyyətli dərəcədə artır.
Harvard Tibb Məktəbinin həkimi, gastroenteroloq Trişa Pasriçanın sözlərinə görə, tualetdə uzun müddət oturmaq düz bağırsaqdakı venoz damarların sıxılmasına səbəb olur. Bu isə toxumaların zəifləməsinə və hemorroid düyünlərinin yaranmasına şərait yaradır.
Aparılan tədqiqat zamanı yüz iyirmi beş nəfər arasında müşahidə aparılıb. Nəticədə məlum olub ki, onların qırx üç faizində babasil əlamətləri var. Daha maraqlısı odur ki, bu qrupun təxminən üçdə ikisi müntəzəm olaraq tualetdə telefon istifadə edib.
Mütəxəssislər xəbərdarlıq edirlər ki, bu vərdiş sadəcə gigiyenik baxımdan deyil, həm də proktoloji sağlamlıq baxımından təhlükəlidir. Telefonla vaxt keçirən insan tualetdə olduğundan daha uzun müddət oturur, bu da risk faktorunu artırır.
Həkimlər profilaktika üçün tualetdə qalma müddətini üç-beş dəqiqə ilə məhdudlaşdırmağı, cihazlardan uzaq durmağı tövsiyə edirlər. Onların fikrincə, belə kiçik dəyişikliklər həm bağırsaq sağlamlığını qoruyur, həm də gələcəkdə daha ciddi xəstəliklərin qarşısını ala bilər.
