“Rusiya və Ukraynanın ev sahibliyi etməyə razılaşacağı təqdirdə, Türkiyə münaqişənin nizamlanması üçün sammit keçirməyə hazırdır”.
Azpost.info xəbər verir ki, bunu Türkiyə prezidenti Rəcəb Tayyib Ərdoğan İstanbulda ukraynalı həmkarı Vladimir Zelenski ilə birgə mətbuat konfransında deyib.
“Biz Rusiyanın da iştirak edəcəyi sülh sammitini keçirməyə də hazırıq”, – Ərdoğan bildirib.
Onun sözlərinə görə, Türkiyə Ukraynanın ərazi bütövlüyü və müstəqilliyini, eləcə də Kiyevin Avro-Atlantik strukturlara inteqrasiya kursunu dəstəkləyir.
“Bugünkü danışıqlarımız zamanı ikitərəfli münasibətlərimizin gündəliyində duran məsələləri ətraflı müzakirə etdik. Biz məmnunuq ki, müharibəyə baxmayaraq, ikitərəfli ticarətimiz stabil şəkildə davam edir”, – Ərdoğan qeyd edib.
Azpost.info
