Türkiyə NATO-nun Baltik ölkələrinin hava məkanının mühafizəsi (Baltic Air Policing) missiyasında iştirak etmək üçün 5 ədəd F-16 qırıcısı və 181-ci eskadrilyanın 76 hərbi qulluqçusunu Estoniyaya göndərəcək.
Bu barədə Hürriyet qəzeti məlumat yayıb.
Türkiyə Hərbi Hava Qüvvələrinin polkovnik-leytenantı Özdəmir Anadolu Agentliyinə bildirib ki, missiya NATO-nun şərq cinahının müdafiəsi baxımından mühüm strateji əhəmiyyət daşıyır.
Onun sözlərinə görə, bu əməliyyat Türkiyənin beynəlxalq çəkindirmə imkanlarının gücləndirilməsinə, müttəfiq ölkələrin silahlı qüvvələri ilə əməkdaşlığın inkişafına və ölkənin strateji potensialının artırılmasına töhfə verəcək.
Məlumata əsasən, avqustdan noyabr ayınadək rotasiya prinsipi ilə həyata keçiriləcək missiya çərçivəsində Türkiyə qırıcıları Latviya, Litva və Estoniyanın hava məkanında patrul xidməti aparacaq.
Həmin ölkələrin özlərinə məxsus döyüş təyyarələri olmadığı üçün onların hava məkanının mühafizəsi NATO üzvü dövlətlər tərəfindən növbəli əsasda həyata keçirilir.
Xatırladaq ki, Bloomberg agentliyi ötən ilin dekabrında NATO-nun Türkiyədən Baltik ölkələrinin hava məkanının mühafizəsi üçün F-16 qırıcılarını planlaşdırılandan bir neçə ay əvvəl göndərməyi xahiş etdiyini yazmışdı.
Məlumata görə, alyans 2026-cı ilin avqust-dekabr aylarında Estoniyada növbəti rotasiya çərçivəsində Türkiyə Hərbi Hava Qüvvələrinin F-16-larından istifadə etməyi planlaşdırır.
Qeyd edək ki, Türkiyə Hərbi Hava Qüvvələri daha əvvəl də NATO missiyaları çərçivəsində 2021-ci ildə Polşanın, 2023–2024-cü illərdə isə Rumıniyanın hava məkanının mühafizəsində iştirak edib.
