Türkiyədən uçan sərnişin təyyarəsi Katmandu hava limanına eniş edərkən yanğın baş verib.
Azpost.info Nepal News-a istinadən xəbər verir ki, İstanbuldan Nepal paytaxtına gedən Türk Hava Yollarına məxsus təyyarənin eniş zamanı təkərlərində yanma baş verib.
Təyyarədə dördü uşaq olmaqla 277 sərnişin olub. Sərnişinlər uğurla təxliyə edilib, lakin xilasetmə əməliyyatı zamanı bəziləri yüngül xəsarətlər alıb.
“Yanğın artıq yanğınsöndürənlərin köməyi ilə lokallaşdırılıb. Təyyarədə olan bütün sərnişinlər təhlükəsizdir.”-deyə hesabatda bildirilir.
Hadisədən sonra Katmandu hava limanında beynəlxalq uçuşlar dayandırılıb.
