Ukrayna prezidenti Vladimir Zelenski Krımın qeyri-hərbi yolla qaytarılması variantlarını nəzərdən keçirməyə hazır olduğunu bəyan edib.
Azpost.info xəbər verir ki, bu barədə “Financial Times” məlumat yayıb.
“Başa düşürəm ki, hamı bu vəziyyət və Krımın başına nə gələcəyi ilə bağlı çaşqındır. Əgər kimsə bizə Krımı qeyri-hərbi yolla işğaldan azad etmək yolunu təklif etməyə hazırdırsa, mən bunun tərəfdarı olacağam”, – Zelenski bildirib.
O qeyd edib ki, Rusiya Silahlı Qüvvələrinin raket zərbələrinin artmasına baxmayaraq, Ukrayna bütün ərazilərini geri qaytarmaqda qərarlıdır.
Zelenski Krımın taleyinin beynəlxalq gündəmdə olduğunu da etiraf edib. Onun sözlərinə görə, bəzi Qərb ölkələri Ukraynanın Krımı qaytarmaq cəhdinin Moskva tərəfindən təhlükəli eskalasiyaya səbəb ola biləcəyindən narahat olduqlarını bildirirlər, bəziləri hətta nüvə silahından istifadəni ehtimal edirlər.
Azpost.info
