Aprelin 5-nə keçən gecə Ukraynaya məxsus PUA-lar Rostov vilayətindəki Morozovsk hərbi aerodromuna hücum edib.
Azpost.info bildirir ki, bu barədə Ukraynanın “Hromadske” nəşri öz mənbələrinə əsasən məlumat yayıb.
Hücum nəticəsində azı altı Rusiya təyyarəsi məhv edilib, daha səkkiz təyyarəyə isə əhəmiyyətli ziyan dəyib. Nəşrin həmsöhbətləri həmçinin hücum zamanı 20 rusiyalı hərbçinin öldüyünü və ya yaralandığını iddia edirlər.
“Hromadske” yazır ki, aerodroma hücumu Ukrayna Təhlükəsizlik Xidməti və Ukrayna hərbçiləri təşkil edib.
Bu barədə “RBC-Ukrayna”nın mənbələri də məlumat yayıb. Nəşrin məlumatına görə, Su-24, Su-24M, Su-34 bombardmançıları Rusiya qoşunlarının Ukrayna Silahlı Qüvvələrinin mövqelərinə və cəbhə xəttində yerləşən Ukrayna şəhərlərinə hücum etmək üçün istifadə etdiyi aerodromda yerləşdirilib.
Rusiya Müdafiə Nazirliyi və müstəqil mənbələr aerodroma hücumu, Rusiya təyyarələrinin məhv edilməsi və ya zədələnməsini hələlik təsdiqləməyib.
Aprelin 5-nə keçən gecə Rostov vilayəti üzərində Ukraynaya məxsus 44 pilotsuz uçan aparat vurulub. Rostov vilayətinin qubernatoru Vasili Qolubevin sözlərinə görə, hava hücumundan müdafiə sistemləri Morozovski vilayətində 40-dan çox hədəfi vurub. Qubernator mesajında aerodromdakı hücumdan bəhs etməyib.
