Ukraynadakı müharibə uzun sürən qeyri-müəyyənlik mərhələsinə daxil ola bilər. Burada yorğunluq və vaxt təzyiqi döyüş meydanındakı hadisələrdən heç də az əhəmiyyət kəsb etməyəcək.
AzPost bildirir ki, “Wall Street Journal”ın ekspertləri 2026-cı ildə Ukraynadakı müharibə üçün üç mümkün ssenari təqdim ediblər.
Birinci ssenari münaqişənin dalana dirəndiyini və uzunmüddətli danışıqların irəliləyiş olmadan davam edəcəyini ehtimal edir.
ABŞ administrasiyası Kiyevin bəzi əraziləri, xüsusən də Donbası güzəştə gedəcəyi təqdirdə Moskvanın sülhə razı olacağını ehtimal edir. Lakin Ukrayna bu cür şərtlərə qarşı çıxır. Rusiya isə Qərb qoşunlarının sərhədinə yerləşdirilməsini qəti şəkildə rədd edir. Bu da razılaşma cəhdlərini çətinləşdirir.
İkinci ssenari Ukraynanın mümkün tükənməsini əhatə edir. Kadr çatışmazlığını kompensasiya etmək üçün dron və texnologiyadan aktiv istifadəyə baxmayaraq Ukrayna ordusu, xüsusən də şərq və cənub sektorlarında məhdud resurslarla üzləşir. Ölkənin gücü tükənərsə, Kiyev müttəfiqlərindən zəif zəmanətlər alarkən Moskvadan son dərəcə sərt şərtlərlə razılaşmaq məcburiyyətində qala bilər.
Üçüncü ssenari Rusiyanın tədricən tükənməsidir. Ölkə iqtisadiyyatı təzyiq altındadır: yüksək faiz dərəcələri, aşağı neft qiymətləri və vacib infrastruktura hücumlar dövlət gəlirlərini sıxışdırır, Çindən asılılıq və hərbi sənayenin prioritetləşdirilməsi isə elitalar arasında narazılığı artırır.
Hərbi əməliyyatların qeyri-müəyyən müddətə davam etdirilməsi mümkün deyil və sanksiyaların artırılması bu prosesi sürətləndirə bilər. Bu halda, hər iki tərəf gələcək müharibənin mümkünsüz olduğunu anlaya bilər və danışıqlar əsl kompromis axtarışına yönələcək.
