Smartfon üçün ucuz USB kabeli almaq qənaət kimi görünsə də, mütəxəssislər bunun sonradan daha böyük xərclərə səbəb ola biləcəyi barədə xəbərdarlıq edirlər. Keyfiyyətsiz kabel təkcə enerji yığma sürətini azaltmır, həm də batareyaya, enerji girişinə və telefonun daxili komponentlərinə zərər verə bilər.
Azpost.info xəbər verir ki, bu barədə BGR portalı məlumat yayıb.
Mütəxəssislərin sözlərinə görə, ucuz USB kabelləri xarici görünüşünə görə orijinal və ya sertifikatlı məhsullardan seçilməsə də, əsas fərq istifadə olunan materiallarda və daxili elektron komponentlərdədir.
Ucuz kabel niyə təhlükəlidir?
Keyfiyyətsiz kabellər elektrik cərəyanını sabit ötürə bilmir. Nəticədə telefon daha yavaş enerji yığır, eyni zamanda daha çox qızır. Davamlı qızma isə litium-ion batareyanın ömrünü qısaldır və onun daha tez sıradan çıxmasına səbəb olur.
Bundan başqa, belə kabellər aşağıdakı problemlərə yol aça bilər:
enerji yığma girişinin zədələnməsi;
qısaqapanma riski;
ana platanın elektron komponentlərinin sıradan çıxması;
fayl ötürülməsi zamanı məlumatların itməsi və ya zədələnməsi.
Əgər kabelin metal hissəsinə toxunarkən elektrik cərəyanı hiss olunursa, bu, kabelin və ya adapterin nasaz olduğunun əlaməti ola bilər. Belə halda aksessuar dərhal dəyişdirilməlidir.
USB-C kabellərində xüsusi qoruma sistemi var
Mütəxəssislər bildirirlər ki, USB-C–USB-C kabellərində E-marker adlı xüsusi çip mövcuddur. Bu çip enerji adapterinə kabelin hansı gücə tab gətirə biləcəyini bildirir və həddindən artıq yüklənmənin qarşısını alır.
USB-A–USB-C kabellərində isə bu funksiyanı 56 kiloomluq rezistor yerinə yetirir. O, telefonun həddindən artıq cərəyan qəbul etməsinin qarşısını alır.
Ucuz məhsullarda isə bu elementlər ya ümumiyyətlə olmur, ya da düzgün işləmir. Nəticədə enerji qeyri-sabit ötürülür, batareya və digər elektron hissələr daha çox yüklənir. Telefonun qoruma sistemi işə düşdükdə isə enerji yığma sürəti avtomatik azalır.
USB kabeli alarkən nələrə diqqət etmək lazımdır?
Mütəxəssislər alış zamanı bir neçə vacib məqama diqqət yetirməyi tövsiyə edirlər:
USB-IF sertifikatının olmasına baxın;
Sertifikatı rəsmi USB-IF bazasında yoxlayın;
Qablaşdırmada yazı səhvlərinin olmamasına diqqət edin;
Loqo və seriya nömrəsinin düzgün göstərildiyini yoxlayın;
Kabelin örtüyünün möhkəm, konnektorlarının isə boşluqsuz olmasına əmin olun.
Ekspertlər hesab edirlər ki, keyfiyyətli və sertifikatlı USB kabelinə xərclənən vəsait sonradan smartfonun bahalı təmirindən daha sərfəlidir. Çünki kabelin keyfiyyəti təkcə enerji yığma sürətinə deyil, həm də telefonun təhlükəsizliyinə və batareyanın xidmət müddətinə birbaşa təsir göstərir.
Sunay
