Rusiya müdafiə nazirinin rüşvət ittihamı ilə həbs edilən müavini Timur İvanov güc strukturlarındakı ən zəngin adamlardan hesab olunur.
Azpost.info xəbər verir ki, “Forbes” 2019-cu ildə onu bu sahənin ən zəngin məmuru kimi qiymətləndirmişdi. 2018-ci ilin sonunda nəşr onun ailəsinin gəlirinin 136,7 milyon rubl olduğunu yazmışdı.
Sanksiyalar siyahısına salınmazdan əvvəl Timur İvanov həyat yoldaşı ilə birlikdə xaricdəki dəbdəbəli kurortlarda vaxt keçirməyi çox sevirdi. Cütlük istirahət üçün əsasən Kot d’Azura üstünlük verirdi. Deyilənlərə görə, bir neçə il ərzində ailə San-Tropedə villalar və yaxtaların kirayəsi üçün təxminən 1 milyon avro xərcləyib.
Hərbi müxbirlər nazir müavinini həyat yoldaşının xüsusi hərbi əməliyyat başlayandan sonra da vərdişlərindən əl çəkmədiyinə və xaricdə dəbdəbəli vaxt keçirməyə davam etdiyinə görə tənqid ediblər.
Demək olar ki, təyin olunduğu andan İvanov “Vaqner”in qurucusu mərhum Yevgeni Priqojinlə münaqişə yaşayıb. Vladimir Putinin qəbulunda olarkən Priqojin İvanovu dəfələrlə büdcə pullarını mənimsəməkdə ittiham edib.
İvanov nazirlikdə əmlakın idarə edilməsi və qoşunların yerləşdirilməsi, ordunun mənzil və tibbi təminatı ilə bağlı məsələlərə nəzarət edirdi. O, həmçinin tikinti işlərinə, Rusiya Müdafiə Nazirliyinin obyektlərinin əsaslı təmirinə və hərbi ipotekaya görə məsul şəxs idi.
Timur İvanov 2016-cı ilin mayında müdafiə nazirinin müavini təyin olunub.
Azpost.info
