“Vətəndaş cəmiyyəti uğrunda” QHT Seçki Müşahidə Koalisiyasının parlament seçkiləri ilə əlaqədar aralıq hesabatı təqdim edilib.
Seçki Müşahidə Koalisiyasının həmtəsisçisi Zaur İbrahimli qeyd edib ki, Koalisiya Naxçıvan MR-də daxil olmaqla ölkə üzrə 75 seçki dairəsində 500 nəfərdən çox müşahidəçi ilə müşahidə aparacaq.
Bildirilib ki, seçkilər ərəfəsində Azərbaycandakı ictimai-siyasi mühit tam sabitdir.
Diqqətə çatdırılıb ki, vətəndaş cəmiyyəti nümayəndələri olan 2 namizəd sosial şəbəkələr vasitəsilə qanunvericiliklə nəzərdə tutulmuş qaydada toplanmış və təqdim olunmuş imzaların etibarsız sayılması ilə verilmiş qərarların qanunsuz olduğunu və subyektiv yanaşmanı əks etdirdiyini bildiriblər.
Bir neçə namizədin imzatoplama kampaniyasına Mənzil Kommunal və Texniki Xidmət Sahələrinin, Bələdiyyələrin əməkdaşlarını cəlb etmək cəhdləri barədə məlumatlar daxil olub.
Sentyabrın 1-də keçiriləcək növbədənkənar parlament seçkilərində 1052 nəfərin deputatlığa namizədliyi qeydə alınıb. Koalisiya MSK məlumatları və açıq mənbələr əsasında qeydə alınmış namizədlərlə əlaqədar təhlil aparıb.
Namizədliyi qeydə alınmış 1052 nəfərin faiz nisbəti ilə yaş qruplara bölgüsü aşağıdakı kimi olub:
18-39 yaş: ~39,4%
40-59 yaş: ~43.0%
60 yaş və yuxarı: ~17,6%
Gender bölgüsünə əsasən namizədlərin faiz nisbəti ilə say bölgüsü aşağıdakı kimidir:
Qadın – 26.4%
Kişi – 73, 6%
Namizədliyi qeydə alınan nəfərdən 308 nəfər 25 siyasi partiyanın nümayəndələridir. 25 siyasi partiyanın 592 nəfər səlahiyyətli nümayəndəsi qeydə alınıb.
Daha çox namizəd 12 saylı Xəzər Birinci Seçki Dairəsində qeydə alınıb. Dairələr üzrə ən az qeydə alınmış namizədlərin sayı isə 6 nəfərdir.
