Həkim
Honq-Konq Politexnik Universitetinin alimləri xəstəliklərin, o cümlədən xərçəngin erkən diaqnostikası üçün yeni texnologiya üzərində işləyirlər. AzPost xəbər verir ki, tədqiqatçılar 3D çap texnologiyasından istifadə etməklə yüksək həssaslığa malik mikrolazer əsasında biosensor yaradıblar.
Sözügedən cihaz polimer mikrolazerdən – pıçıltı qalereyası rezonatorundan istifadə etməklə hazırlanıb və laboratoriya çiplərində erkən diaqnostika üçün yeni imkanlar yaradır.
Əsas texnoloji yenilik limakon formalı mikrorezonator həndəsəsinin tətbiqidir. Bu forma vasitəsilə daha əvvəl bu tip sensorların tətbiqində müşahidə olunan çətinliklərin bir qismi aradan qaldırılır.
İstiqamətləndirilmiş işıq emissiyası siqnalın oxunmasını asanlaşdırır və bu da cihazın mikrofluidik sistemlərə daha rahat inteqrasiyasına imkan verir.
Əlavə olaraq qeyd olunur ki, bu yenilik sayəsində konik optik liflərə – diametri iki mikrometrdən az olan, çətin konfiqurasiyaya malik və xarici təsirlərə həssas komponentlərə ehtiyac qalmır.
Alimlər hesab edirlər ki, bu texnologiya gələcəkdə effektiv və qənaətcil diaqnostika metodlarının əsasını təşkil edə bilər.
