Bu il Azərbaycan ali təhsil sistemində mühüm rol oynayan Xəzər Universitetinin yaradılmasının 35 illiyi qeyd edilir. 1991-ci ildə bütün postsovet məkanında ilk özəl ingilisdilli universitet kimi yaradılan Xəzər Universiteti ötən 35 il ərzində Azərbaycanda ali təhsilin modernləşməsinə mühüm töhfə verib. Universitet beynəlxalq akademik əməkdaşlıq, keyfiyyətli təhsil modeli və elmi fəaliyyətin inkişafı sahəsində önəmli uğurlar əldə edərək ölkənin aparıcı ali təhsil və tədqiqat mərkəzlərindən birinə çevrilib.
Yubiley ili çərçivəsində17-19 mart tarixlərində silsilə tədbirlərin təşkil olunması planlaşdırılır. 35 illik yubiləyə həsr olunmuş ilk tədbir mart ayının 17-də beynəlxalq əməkdaşlıq mühitində Hilton hoteldə keçiriləcək. Tədbirdə dövlət və hökumət nümayəndələrinin, diplomatik korpus üzvlərinin, ölkənin və dünyanın müxtəlif universitetlərinin rəhbərlərinin, akademik ictimaiyyətin, biznes tərəfdaşlarının, məzunların və tələbələrin iştirakı gözlənilir.
Yubiley mərasimi xüsusi bədii kompozisiya ilə başlayacaq. Xəzər Universitetinin tələbələrdən ibarət xor kollektivi kamera orkestrinin müşaiyəti ilə Azərbaycan Respublikasının Dövlət Himnini səsləndiriləcək.Tədbir zamanı Xəzər Universitetinin yaradıldığı ilk illərdən bu günə qədər keçdiyi inkişaf yolunu əks etdirən film nümayiş olunacaq.
Yubiley mərasiminin rəsmi hissəsində Xəzər Universitetinin təsisçisi və Direktorlar və Qəyyumlar Şurasının sədri professor Hamlet İsaxanlının, rektor Razia xanım İsayevanın çıxışları, həmçinin dünyanın bir sıra aparıcı universitetlərinin rektorları, ölkənin ictimai-siyasi həyatında mühüm rol oynayan millət vəkilləri, ziyalılar, qonaqlar təbrik nitqləri səsləndiriləcəklər.
Daha sonra xüsusi yubiley təltifləri təqdim ediləcək və incəsənət xadimlərinin iştirakı ilə konsert proqramı təqdim olunacaq.
Xəzər Universitetinin 35 illik yubileyi yalnız keçilən yolun qeyd olunması deyil, həm də universitetin gələcək inkişaf istiqamətlərini və qlobal akademik məkanla əməkdaşlığının daha da genişləndirilməsi məqsədini nümayiş etdirən əlamətdar hadisədir.
