Qazaxıstanda həyata keçirilən strateji infrastruktur layihəsi – Xəzər dənizinin dibi ilə Transxəzər fiber-optik rabitə xəttinin çəkilişi yeni mərhələyə keçib. Layihənin 2026-cı ilin sonunadək istismara verilməsi planlaşdırılır.
Qazaxıstanın Süni İntellekt və Rəqəmsal İnkişaf Nazirliyinin məlumatına görə, hazırda layihənin dəniz mərhələsi icra olunur.
Çində istehsal edilən optik kabel əvvəlcə Kurık limanına çatdırılıb. Daha sonra ümumi çəkisi 600 ton olan üç xüsusi kabel konteyneri logistik gəmi ilə Bakıya gətirilib.
Bakı limanından yola çıxan xüsusi kabeldüzən gəmi artıq Aktau limanı istiqamətində Xəzərin dibi ilə optik rabitə xəttinin çəkilişinə başlayıb.
Layihədə su tutumu 20 min tondan çox olan, dinamik mövqeləndirmə sistemi ilə təchiz edilmiş müasir kabeldüzən gəmi iştirak edir. Gəmidə 70 nəfərlik heyət, o cümlədən texniki nəzarət mütəxəssisləri və “Kazakhtelecom” şirkətinin nümayəndələri çalışırlar.
Transxəzər layihəsi CaspiLink B.V. birgə müəssisəsi tərəfindən həyata keçirilir. Müəssisə Qazaxıstanın “Kazakhtelecom” və Azərbaycanın “AzerTelecom International” şirkətlərinin tərəfdaşlığı əsasında yaradılıb.
Hava şəraitinin əlverişli olacağı təqdirdə, sualtı kabelin birbaşa çəkilişinin 15–20 gün ərzində başa çatdırılması gözlənilir. Layihə üzrə bütün texnoloji və sınaq işlərinin isə 2026-cı ilin sonunadək tamamlanması nəzərdə tutulur.
Bu layihə Xəzər regionunda rəqəmsal əlaqələrin gücləndirilməsi, məlumat ötürmə imkanlarının artırılması və Asiya ilə Avropa arasında yeni rəqəmsal dəhlizin formalaşdırılması baxımından strateji əhəmiyyət daşıyır.
