ABŞ-ın Lockheed Martin şirkəti ucuz pilotsuz uçuş aparatlarının (PUA) kütləvi hücumlarına qarşı nəzərdə tutulan yeni MORFIUS sistemini təqdim edib.
Azpost.info bildirir ki, yeni sistem yüksək güclü mikrodalğalı şüalanma (HPM – High Power Microwave) texnologiyasından istifadə edərək pilotsuz uçuş aparatlarının elektron idarəetmə sistemini sıradan çıxarır.
Məlumata görə, MORFIUS istiqamətləndirilmiş elektromaqnit impulsları yaradaraq dronların naviqasiya və idarəetmə elektronikasını bir neçə saniyə ərzində yararsız hala salır. Adi raket sistemlərindən fərqli olaraq, bu texnologiya eyni vaxtda bir neçə hədəfi vurmağa imkan verir və koordinasiyalı PUA hücumlarına qarşı daha effektiv hesab olunur.
Sistemin əsas üstünlüklərindən biri də onun təkrar istifadə oluna bilməsidir. Bir uçuş zamanı MORFIUS-un 50-yə qədər pilotsuz uçuş aparatını zərərsizləşdirə bildiyi bildirilir. Tapşırıq başa çatdıqdan sonra dron bazaya qayıdır, batareyası dəyişdirilir və yenidən döyüş tapşırığına göndərilir.
MORFIUS konkret radar və ya idarəetmə sistemindən asılı deyil. Buna görə də o, müxtəlif sensorlar, radarlar və komanda-idarəetmə şəbəkələri ilə inteqrasiya oluna bilir. Sistem yerüstü və hava platformalarından, eləcə də hərəkətdə olan nəqliyyat vasitələrindən xüsusi buraxılış borusu vasitəsilə işə salına bilir.
Lockheed Martin şirkəti MORFIUS-u çoxqatlı hava hücumundan müdafiə sisteminin mühüm elementi kimi qiymətləndirir. Şirkətin fikrincə, bu sistem xüsusilə ucuz və kütləvi pilotsuz uçuş aparatlarının hücumlarına qarşı həm effektiv, həm də iqtisadi cəhətdən sərfəli müdafiə vasitəsi olacaq.
