Yaşlı insanlarda beyin funksiyasının qorunub saxlanması üçün istənilən fiziki fəaliyyət vacibdir. Söhbət təkcə bədəndən deyil, həm də beyindən gedir. Bu, aerobika, üzgüçülük, yoqa və ya pilates ola bilər. Yaşlı insanlarda çox vaxt tarazlıq problemləri yarandığından, onlar üçün fiziki məşqlər çox vacibdir. Onlar, həmçinin aşağı ətrafları gücləndirmək üçün güc məşqləri etməlidirlər, çünki zəiflik yerimə ilə bağlı problemlərə səbəb ola bilər. Gildən fiqurlar düzəldilməsi, düymələrin barmaqla hərəkət etdirilməsi və ya qarışmış noxud və mərciməklərin ayırması kimi məşğələlər kiçik motorikanın inkişafı üçün əlavə fayda verir. Barmaqların işləməsi kiçik motorikanın aktivləşməsində mühüm rol oynayır ki, bu da beyin funksiyasına effektiv təsir göstərir.
Bu fikri AZƏRTAC-ın müxbiri ilə söhbətdə Bakı Herontoloji Mərkəzinin nevrologiya şöbəsinin müdiri, həkim-nevroloq Aytən Mürsəlova bölüşüb.
İntellektual məşqlərə gəldikdə, həkim-nevroloq krossvordların yaşlılar üçün faydalı olduğuna dair son zamanlar geniş yayılmış mülahizəyə şübhə ilə yanaşdığını söyləyib. O qeyd edib ki, krossvordlar insanlara bildikləri məlumatları, sadəcə, təkrarlamağa kömək edir. “İnsanlar həmişə bildiklərini xatırlayaraq onları həll edirlər. Lakin beyin fəaliyyətini və zehni aydınlığı qoruyub saxlamaq üçün neyronlar arasında yeni əlaqələrin yaranması zəruridir. Beyinə yeni məlumat daxil olduqda yeni əlaqələr yaranır. Bu səbəbdən sudoku, müxtəlif beyin oyunları, pazllar, şahmat və ya dama oyunları krossvordlardan daha faydalıdır. Mövcud məlumatların təkrarlanması beyni inkişaf etdirmir, o, sadəcə artıq mövcud neyron əlaqələrini gücləndirir, lakin yenilərini yaratmır. Əsas diqqət məhz yeni əlaqələrin yaradılmasına yönəldilməlidir”, – deyə Aytən Mürsəlova fikrini yekunlaşdırıb.
