Türk dünyasının mediakörpüsü olmağı hədəfləyən “Mediaturk” televiziya türklərin yaşadığı geniş məkana xitab edəcək. Müstəqil türk dövlətləri – Azərbaycan, Türkiyə, Qazaxıstan, Qırğızıstan, Türkmənistan və Özbəkistanla yanaşı, türk xalqlarının sıx məskunlaşdığı bütün coğrafiyada olacaq.
Türk dünyasının diasporu, parlamenti, siyasəti, təhsili, ədəbiyyatı, mədəniyyəti, mediası, tarixi, iqtisadiyyatı və səhiyyəsi, demək olar ki, bu kanalda əksinə tapacaq.
Televiziyanın təsisçiləri Milli Məclisin deputatı Cavanşir Feyziyev və Əməkdar jurnalist Elşad Eyvazlı, baş redaktoru isə gənc jurnalist Nəzrin Abduldur.
“Mediaturk” TV-nin yaranması və hədəfləri barədə danışan Cavanşir Feyziyev bildirib ki, kanalın 28 may günündə fəaliyyətə başlaması təsadüfi deyil: “28 may hər bir azərbaycanlı üçün əziz gün olmaqla bərabər, həm də bütün türk dünyasının dövlətçilik təkamülündə dərin iz buraxmış şanlı bir tarixdir. 1918-ci ilin bu günündə türk dünyasının ilk respublikası – Azərbaycan Xalq Cümhuriyyətinin yaranması elan olunub.
Açılışını elan etdiyimiz bu internet TV kanalı ümumi gələcək haqqında türk dünyasının arzularının gerçəkləşməsinə xidmət edəcək. Hələ ki, “Mediaturk” internet televiziyası kimi bütün türk ölkələrində yaşayan soydaşlarımızın maddi və mənəvi dəstəyi ilə fəaliyyət göstərəcək. Əminəm ki, bu kanal dünya türklərini biri-birinə yaxınlaşdıran, doğmalaşdıran və nəhayət, sevdirən bir cazibə mərkəzinə çevriləcək”.
Kanalın həmtəsisçisi Elşad Eyvazlı isə qeyd edib ki, platforma türk dünyası jurnalistlərinin fikir mərkəzi, doğma evi olacaq: “Mediaturk” türk dünyasına xidmət üçün yaradılıb. Çalışacağıq ki, türk toplumunun dünyadakı səsi olaq. Qarşıda uzun bir yol var. Bu yolda dünyada yaşayan hər bir türkün dəstəyinə ehtiyacımız olacaq”.
