Azərbaycan İnternet Forumunun prezidenti Osman Gündüz TƏBİB tabeliyində olan “Yeni Klinika”nın Prezident İlham Əliyevin fərmanını pozmaqda ittiham edib.
Azpost.info bildirir ki, Osman Gündüz “Yeni Klinika” Publik Hüquqi Şəxsin tender elanını tənqid edib. Ekspertin sözlərinə görə, “TƏBİB tabeliyində olan “Yeni Klinika” Publik Hüquqi Şəxs tender elan edib. Qurum səbəkə avadanlıqları, serverlər, onlar üçün lisenziyalar, kommutatorlar və s. texnoloji avadanlıqlar alacaq. Yəni, qurum özünün Data Mərkəzini daha da gücləndirir.
O bunu dövlət sektorunda “paralelçilik və təkrarçılıq” adlandırıb: “Prezidentin fərmanı ilə məhz bu tip fəaliyyət üçün, dövlət xərclərini azaltmaq, optimallaşdırmaq və səmərəlilik baxımından “Hökumət Buludu” ( G-cloud) yaradılıb. Yəni, dövlət qurumları özləri üçün server almağı, data baza formalaşdırmağı dayandırmalı və bu işləri bir mərkəzdə, AzİnTelecom-un Data Mərkəzində yerləşdirməliydi. Bu məqsədlə dövlət büdcəsindən də xeyli vəsaitlər ayrılıb. İndi belə çıxır ki, dövlət xərcləri nəinki azalıb, heç olmasa nəinki əvvəlki qaydada qalıb, əksinə büdcə xərcləri daha da artıb. Yəni, Prezidentin fərmanında nəzərdə tutulanlar reallaşmayıb, əksinə daha pis mühit formalaşıb”.
Osman Gündüz əvvəllər də bəzi dövlət qurumlarının bu tip addımları haqqında yazıb: Təəssüf ki, hələlik heç bir nəticə görsənmir. Proses davam edir. Ümid edək, AzİnTelecom, TƏBİB, RİNN, Antiinhisar, layihəyə rəy verənlər Prezidentin müvafiq fərmanının tələblərini nəzərə alacaqlar”.
Azpost.info
