Ukrayna prezidenti Vladimir Zelenski Təhlükəsizlik Xidmətinin rəhbəri İvan Bakanovu daha uyğun biri ilə əvəzləmək istəyir.
Azpost.info xəbər verir ki, bu barədə “Politico” mənbələrə istinadən yazıb.
“Ukrayna hökuməti Bakanovun işindən son dərəcə narazıdır. Onu kimin əvəz edə biləcəyi hələlik məlum deyil”, – nəşr qeyd edir.
“Politico” Ukrayna prezidentinə yaxın olan dörd məmura və adı açıqlanmayan Qərb diplomatına istinad edir.
Nəşrin həmsöhbətlərindən birinin sözlərinə görə, Zelenski yaxın çevrəsindən kiminsə işdən çıxarılmasının nəticələrindən narahatdır.
“Politico” yazır ki, indi Təhlükəsizlik Xidmətinin gündəlik əməliyyatlarının çoxu prezidentin ofisindən, xüsusən də Zelenski və onun ofisinin rəhbəri tərəfindən həyata keçirilir.
“Təhlükəsizlik Xidməti rəhbərinin Rusiyanın Ukraynadakı hərbi əməliyyatına münasibətindən çoxları razı deyil. Biz onun işindən, idarəçiliyindən son dərəcə narazıyıq və ondan qurtulmaq üçün çalışırıq”, – deyə adı açıqlanmayan yüksək rütbəli ukraynalı məmur deyib.
“Politico” qeyd edir ki, Ukrayna Təhlükəsizlik Xidmətində 30 mindən çox işçi çalışır. Bu, Britaniya kəşfiyyat xidməti MI5-də olduğunudan 7 dəfə çoxdur. Qurumun vəzifələrinə kəşfiyyat məlumatlarının toplanması ilə yanaşı, iqtisadi cinayətlərə və korrupsiyaya qarşı mübarizə də daxildir.
Azpost.info
