İlk hasilatdan 2025-ci ilin birinci rübünün sonunadək nəhəng Şahdəniz yatağından təqribən 243 milyard kubmetr qaz və 50 milyon ton kondensat əldə olunub.
AzPost bildirir ki, bu barədə “bp” şirkətindən məlumat verilib.
Məlumatda qeyd olunur ki, 2025-ci ilin birinci rübündə Şahdəniz üzrə fəaliyyətlərə təxminən 726 milyon dollar əməliyyat xərcləri və təxminən 213 milyon dollar əsaslı xərclər çəkilib.
Bu xərclərin böyük əksəriyyəti Şahdəniz 2 layihəsinə aid olub.
Rüb ərzində Şahdəniz yatağından Azərbaycan (SOCAR-a), Gürcüstan (GOGC şirkətinə), Türkiyə (BOTAŞ şirkətinə) bazarlarına, çoxsaylı obyektlər üçün BTC-yə və Avropadakı alıcılara qaz çatdırılması davam edib.
İlin ilk üç ayında yataqdan ümumilikdə – “Şahdəniz Alfa” və “Şahdəniz Bravo” platformalarından birlikdə təqribən 7 milyard standart kubmetr qaz və təxminən 1 milyon ton (təqribən 8 milyon barel) kondensat hasil edilib.
Mövcud Şahdəniz qurğularının hasilat gücü hazırda gündə təxminən 76,4 milyon (ildə təqribən 27,9 milyard) standart kubmetrdir.
Xəzərin Azərbaycan sektorunda yerləşən “Şahdəniz” yatağı 1999-cu ildə kəşf olunub. Bakıdan 70 kilometr cənub-şərqdə, suyun dərinliyinin 50-500 m arasında dəyişdiyi Xəzər dənizinin şelfində yerləşir. Bu yataq dünyanın iri qaz-kondensat yataqlarından biridir. 1999-cu ilin iyununda ehtiyatları bu günə ehtiyatları 1,2 trilyon kubmetr qaz və 240 milyon ton kondensatdan ibarətdir.
2006-cı ildə saziş sahəsində bir hasilat platforması quraşdırılıb və həmin ilin noyabrında bu platformadan qazılmış quyudan ilk qaz hasil edilib.
