Rusiyalı jurnalistlər Rusiya prezidentinin keçmiş xüsusi nümayəndəsi Anatoli Çubaysın Moskva vilayətinin Odintsovo rayonunda dəbdəbəli villasını tapıblar.
Azpost.info xəbər verir ki, iqamətgah Moskva yaxınlığındakı “Peredelki” kəndində, 1,56 hektarlıq ərazidə yerləşir.
Ərazidə əsas yaşayış binası 2,7 min, qonaq evi 736, gözətçi evi 585 və qaraj 374 kvadratmetrlik sahəni əhatə edir. Əsas binada 20-dən çox otaq, üzgüçülük hovuzu və bahalı avadanlıqla təchiz olunmuş böyük ev kinoteatrı var. Qaraj ən azı on biznes-klass avtomobilinin yerləşəcəyi qədər böyükdür.
Malikanənin dəyəri iki milyard rubldan çox qiymətləndirilir. Çubaysın həyat yoldaşı, rejissor və teleaparıcı Avdotya Smirnova keçmiş müsahibələrində evin məşhur memar Sergey Skuratovun layihəsinə uyğun tikildiyini qeyd etmişdi.
“Çubaysın mobil telefonu hazırda işləmir. Bəzi məlumatlara görə, sabiq məmur Türkiyədədir. Martın sonunda mətbuatda onun İstanbuldakı bankomatlardan birinin yanında fotosu dərc olunub. Daha sonra o, türk restoranlarından birində aktrisa Paulina Andryeva ilə birlikdə görülüb. Kreml Çubaysın Rusiya prezidentinin davamlı inkişaf üzrə xüsusi nümayəndəsi vəzifəsini tərk etdiyini rəsmən təsdiqləyib”, – məlumatda bildirilir.
Azpost.info
