Rusiyanın beynəlxalq təşkilatlarla əməkdaşlıq üzrə prezident nümayəndəsi Boris Titov bildirib ki, 2025-ci ildə Rusiyaya minimum 40 min əmək miqrantı Hindistandan gətiriləcək.
AzPost xəbər verir ki, Titov qeyd edib ki, dəqiq say hələ məlum deyil, lakin bu rəqəm daha aşağı olmayacaq. O bildirib ki, hind işçilərin Rusiyaya cəlb olunması ölkədə işçi qüvvəsi çatışmazlığını kompensasiya edə bilər.
Statistikaya görə, 2022-ci ildə Rusiyaya 8 min, 2023-cü ildə 14 min, 2024-cü ildə isə 36 min hind miqrant vizası verilib. 2025-ci il üçün ümumi kvota təxminən 235 min nəfər müəyyən olunub ki, onlardan 72 mini Hindistana ayrılıb.
Titov əlavə edib ki, Hindistan işçiləri Dubayın inşasında da əsas rol oynayıblar və Rusiyanın iqtisadiyyatında peşəkar hind işçilərin iştirakı vacibdir. Eyni zamanda, Hindistan üçün işçi miqrasiyası valyuta gəlirlərinin mühüm mənbəyi sayılır; 2024-cü ildə ölkəyə köçürmələr 129 milyard dollar təşkil edib.
