Bəzi insanlar gözləri önündə müxtəlif qara ləkə və nöqtələrin, yaxud onların öz dili ilə desək, həşərata oxşayan müxtəlif formalı obyektlərin uçduğunu deyir və onun təhlükəli olub-olmaması ilə maraqlanırlar.
Azpost.info xəbər verir ki, həkim-oftalmoloq Aynurə Əliyeva bununla əlaqədar deyib: “Əslində bunlar çox vaxt heç bir təhlükə doğurmur. Lakin patologiyası olanlarda gözün açıq və yaxud qapalı vəziyyətindən, həmçinin səhər və axşam saatlarından asılı olmayaraq, ildırım çaxan kimi işıq qığılcımları hiss edirlərsə, bu halda təhlükəlidir, qalan bütün hallarda təhlükəsizdir. Bu, göz alması boşluğunu dolduran yumurta ağına oxşayan gel formalı şüşəvari cismin müxtəlif formalı şəffaf destruksiyasıdır. İşıq kütləsi güclü düşəndə şəffaf destruksiyaların kölgələri göz dibinə düşür və bunun nəticəsində qara formalı müxtəlif üzən obyektlər ləkə kimi təzahür edir. Onlar daha çox güclü işıq fonunda nəzərə çarpır və demək olar ki, təhlükəsizdir”.
Axşam saatlarında avtomobil idarə edənlərin qarşıdan gələn avtomobilin işığından gözlərinin qamaşması barədə isə həkim-oftalmoloq deyib: “Bu, əsasən buynuz qişanin sındırma qüvvəsinin patoloji vəziyyəti, refraksiya qüsuru olan astiqmatizm nəticəsində yaranır. Astiqmatizm isə eynək və yaxud kontakt korreksiyası ilə aradan qaldırılır. Bəzən gözündə quruluq olanlarda da həmin şikayətlərə rast gəlmək olur. Bunun üçün nəmləndirici damlalardan istifadə etmək kifayətdir”.
