Qırğızıstan və Tacikistanın topoqrafik işçi qrupları dövlət sərhədinin daha 38,35 kilometri ilə bağlı razılığa gəliblər.
Azpost.info xəbər verir ki, bu barədə Qırğızıstan Nazirlər Kabinetinin mətbuat xidməti məlumat yayıb.
İki ölkənin nümayəndələri razılığı yanvarın 10-dan 16-dək Batken şəhərində dövlət sərhədinin delimitasiyası və demarkasiyası məsələləri ilə bağlı keçirilən görüşdə əldə ediblər.
“Tərəflər Tacikistan Respublikası ərazisində keçiriləcək növbəti görüşdə qalan sahələrin təsviri üzərində işi davam etdirəcəklər. İclasın yekunu üzrə müvafiq protokol imzalanıb”, – Nazirlər Kabinetindən bildirilib.
Qırğızıstan-Tacikistan sərhədinin ümumi uzunluğu 972 kilometrdir. 2002-ci ildən 2020-ci ilə qədər ölkələr dövlət sərhədinin 519 kilometrini dəqiqləşdiriblər. 2022-ci ildə ikitərəfli danışıqlardan sonra Qırğızıstan və Tacikistan prezidentləri ümumilikdə 664 kilometrə razılaşdıqlarını təsdiqləyiblər.
Qırğızıstanla Tacikistan arasında sərhədi qeyri-müəyyən olan ərazilər səbəbindən iki ölkənin sərhədyanı ərazilərində vaxtaşırı münaqişələr yaranır və bu münaqişələr dəfələrlə silahlı toqquşmalara çevrilib. Ən böyük silahlı münaqişə 2022-ci ilin payızında baş verib.
Azpost.info
